भांगरभूंय | प्रतिनिधी
भांगरभूंय । खेळां मेज
पणजीः गोवा जीएसबी स्पोर्ट्स अॅण्ड चॅरिटेबल ट्रस्टान गोंय सारस्वत समाजाच्या पालवान आयोजीत केल्ल्या गोंय जीएसबी युनिटी कप टी-20 क्रिकेट सर्तींत आयतारा सीक्यूएस स्कोरींग विलोज आनी मडगांव रॉयल्सान जैताची नोंद केली. सिंक रेंजर्सना जैता खातीर दिल्लें 144 धांवड्यांचें लक्ष्य सीक्यूएस विलोजान 17.4 ओव्हरींत 8 विकेटी वोगडावन हातासलें. मडगांव रॉयल्यान म्हापशें ड्रीम क्रशर्सांक 23 धांवड्यांनी हारयलें. मडगांव रॉयल्साच्या 8 आवट 157 धांवड्यांत जाप दितना म्हापशें क्रशर्साचो डाव 134 धांवड्यांत सोपलो.
दोनूय मॅची मडगांवच्या एमसीसी मैदानार जाल्यो. सीक्यूएसन टॉस जिखून बॉलींग करपाचें थारायल्या उपरांत सिंक रेंजर्सान 11.4 ओव्हरींत 4 आवट 106 अशी बरी सुरवात केली. मात मदल्या आनी निमणे फळयेंतल्या बॅट्समनांनी जाय तसो खेळ केलो ना आनी तांकां फकत 143 धांवड्यो करप शक्य जालें. लक्ष्याचो फाटलाव करतना सीक्यूएसाच्या सर्वेश प्रभुगांवकारान 21 बॉलांत 35 धांवड्यो केल्यो. 6 आवट 100 अशें स्थितींत आसतना वरुण कुडचडकारान 22 बॉलांत केल्ल्या नाबाद 36 धांवड्यांक लागून तांका जैत मेळ्ळें. सर्वेश प्रभुगांवकाराक मॅन ऑफ दी मॅच इनाम फावो जालें
दुसरे मॅचींत मडगांव रॉयल्साचे ओपनर दामोदर पै पाटणेकार (29) आमी महेंद्र अवदी (21) हांणी 52 धांवड्यांची सलामी दिली. मदल्या फळयेंतल्या सनत प्रभुदेसाय हाणे 24 बॉलांत 40 आनी विक्रम गायतोंडेन 23 बॉलांत 31 धांवड्यो केल्यो. हाका लागून तांकां 8 आवट 157 मेरेन मजल मारपाक मेळ्ळी. मडगांव रॉयल्साच्या निमय कामतीन 17 धांवड्यांत 3 विकेटी घेवंन म्हापशें ड्रीम क्रशर्सांक बॅकफूटार धाडलें, डावांतल्या निमण्या बॉलार ड्रीम क्रशर्सांचो डाव 134 धांवड्यांत सोपलो. निमय कामत मॅन ऑफ दी मॅच थारलो.
सर्तींतल्या 14 मॅची उपरांत अ गटांत म्हापशें ड्रीम क्रशर्स, मडगांव रॉयल्साचे दरेकी 3 मॅचींतल्यान 4 गुण जाल्यात. ह्या गटांत ते पयल्या आनी दुसरे सुवातेर आसात. ब गटांत 2 मॅचींतल्यान 4 गुणां सयत अंत्रूज स्ट्रायकर्स पयल्या जाल्यार 3 मॅचींतल्यान मेळिल्ल्या 4 गुणांनी सिंक रेजर्स दुसरे सुवातेर आसा. काणकोण वॉरियर्स 2 गुणानी तिसरे सुवातेर आसा.
.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
