भांगरभूंय | प्रतिनिधी
आल्कॉन जीएसबी युनिटी करंडक टी- 20 क्रिकेट सर्त
भांगरभूंय । खेळां बातमीदार
पणजीः सीक्यूएस स्कोअरींग विलोज पंगडान काणकोण वॉरियर्साचेर आनी म्हापशें ड्रीम क्रशर्स पंगडान मडगांव स्ट्रायकर्साचेर जैत जोडलें. आल्कॉन जीएसबी युनिटी करंडक टी- 20 क्रिकेट सर्तींतल्यो ह्यो मॅची आयतारा मडगांवच्या एमसीसी मैदानाचेर खेळयिल्ल्यो.
‘अ’ गटांतल्यान मडगांव रॉयल्स आदींच सेमीफायनलींत पावला. आयताराच्या जैता सयत म्हापशें ड्रीम क्रशर्सान गटांत दुसरो नंबर मेळयला. चवथ्या नंबरा वयलो रेंजर्स आनी सगळ्यांत निमाण्या मंबराचेर आशिल्ल्या मठग्राम वॉरियर्स हांचे मदीं 20 एप्रीलाक मॅच जातली. रेंजर्स पंगडाक हे मॅचींत जैत मेळ्ळें जाल्यार तो ह्या गटांत 8 गुणा सयत सेमिफायनलींत पावतलो. हार घेवची पडली जाल्यार मात तांचें आव्हान सोंपतलें. ‘ब’ गटांत सेमिफायनलींत वचपा खातीर सीक्यूएस स्कोअरींग विलोजाक काणकोण वॉरियर्साचो खेळ 107 परस उण्या धांवड्यांचेर आडावची गरज आशिल्ली, पूण तांकां तें जमलें ना. जैता उपरांत लेगीत सीक्यूएस स्कोअरींग विलोजाचे (0.509) सींक रेंजर्सा प्रमाण 6 गूण जाले. पूण धांवगती उणी आशिल्ल्यान तांचें सर्तींतलें आव्हान सोंपलें. सींक रेंजर्सान (0.759) ‘ब’ गटांतल्यान सेमिफायनलींत पावपी दुसरो पंगड जावपाचो मान मेळयलो. ह्या गटांतल्यान अंत्रूज स्ट्रायकर्स हे आदींच सेमिफायनलींत पावला.
जैत मेळुनूय सोंपलें आव्हान
सीक्यूएसान 18 धांवड्यांनी जैत मेळयलें, तरी लेगीत तांचें सर्तींतलें आव्हान सोंपलें. तशेंच 6 विकेटी राखून व्हड जैत मेळोवन लेगीत ड्रीम क्रशर्साक सेमिफायनलींतली सुवात निश्चीत करपाक जाली ना. गोवा जीएसबी स्पोर्टस् अॅण्ड चॅरिटेबल ट्रस्टान गोंय सारस्वत समाजाच्या पालवान हे सर्तीचें आयोजन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
