भांगरभूंय | प्रतिनिधी
पणजीः सरकारी आदेशा प्रमाण, बिगर-घरगुती अ-सवलत सिलिंडराची पुरवण ६०% पांवड्यार राखून दवरिल्ल्यान वेवसायीक गॅस बाजार स्थिर दवरपाक मजत जाता, अशें नागरी पुरवण खात्याचे सचिव संजीव गडकार हांणी सांगलें. घरगुती गॅस बुकिंगच्या चडटी-देंवतचेर भाशण करतना तांणी म्हणलें, झुजाचे परिस्थिती पयलीं सदांच सरासरी ११,४१२ सिलिंडरांचें बुकींग जातालें, जें मार्च २०२६ त वाडून १३,०३७ जाल्लें. मात, एप्रिल २०२६त हें प्रमाण ८,९५२ मेरेन सकयल देंवलें. हें मागणेचें सुलभीकरण दाखयता.
थळाव्या नाम्याचो पुरावो नाशिल्ले स्थलांतरीत मजूर आनी विद्यार्थी हांचे मजगती खातीर तेल विपणन कंपन्यांनी एप्रिल २०२६ मजगतीं सुमार ११,००० ’फ्री ट्रेड’ ५ किलोचे एलपीजी सिलिंडर वाटले. गडकार हांणी नमूद केलां, जांचे कडेन थळावीं रावपाचीं कागदपत्रां नात, अश्या लोकांक एलपीजी मेळयतना येवपी आडमेळीं पयस करप आनी तांकां जेवणाचो गरजेचो गॅस उपलब्ध करून दिवप, हो ह्या उपक्रमाचो मखेल हेतू आसा.
पांडे हांणी डिजिटल प्रणालींतल्या म्हत्वाच्या सुधारणांचेर उजेड घातलो. तांणी म्हणलें, डिजिटल बुकिंगची टक्केवारी ९०% च्या वयर पावल्या, जी मार्च २०२६ पयलीं ७०-७५% आशिल्ली. हो बदल आमच्या कामकाजांत आयिल्ली. सुसूत्रता दाखयता. तांणी मुखार म्हणलें, डिलिव्हरी ऑथेंटिकेशन कोड (DAC)/OTP चो वापर आतां ९०%परस चड जाला, जो आदीं फकत ३२-३३% आशिल्लो. हाका लागून आमचे वाटपाचे प्रक्रियेंतली पारदर्शकताय व्हडा प्रमाणांत वाडल्या.
निमाणें गडकार हांणी, डिजिटल बुकींग आनी वाटपाचे पारदर्शकतायेंतल्यो ह्यो सुदारणा गोंयच्या आमच्या गिरायकांक विस्वासू आनी कार्यक्षम सेवा सुनिश्ची करपा खातीर सामक्यो म्हत्वाच्यो. तशेंच हाचे वरवीं आमी ऑपरेशन्सांतले पारदर्शकतेचो सर्वोच्च दर्जो राखतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
