भांगरभूंय | प्रतिनिधी
टेम्पो रिक्षाचो मोटारसायकलीक धपको
म्हापशें: सिरसय हांगा झारापकार पॅत्रॉललपंपा कुशीक गुड्स कॅरियर रिक्षा टेम्पोन दुचाकीक धपको दिल्ल्यान जाल्ल्या अपघातांत शैलेश दिलीप नानोडकार (45, रा. भटवाडी नानोडें, दिवचल) ह्या दुचाकी चालकाक जाग्यारूच मरण आयलें.
हो अपघात बुधवारा सकाळीं 11.30 वरांच्या सुमाराक घडलो. मयत दुचाकी चालक हो अस्नोडें सावन सिरसय झारापकार पॅत्रॉलपंपार आपल्या जीए 07 एच 7370 ह्या क्रमांकाच्या मोटारसायकली वयल्यान पॅत्रॉल घालपा खातीर येतालो. जाल्यार विरोधी दिशेन एमएच 07 एजे 2958 क्रमांकाचो अशोक लॅलण्ड गुड्स कॅरयर रिक्षा टेम्पो वतालो.
पंपा कुशीचे देंवतेर टेम्पोन मोटारसायकलीक नेटाचो धपको दिलो. ह्या अपघातांत दुचाकी चालक मयत शैलेश नानोडकार हो गंभीर जखमी जालो आनी थंयच ताका मरण आयलें. मयत दुचाकी चालका कडेन हॅल्मेट आशिल्लें पूण ताणें तें तकलेर घालूंक नाशिल्लें.
घडणुकेची म्हायती मेळटकूच कोलवाळ पुलिसांनी घडणूक थळार धांव घेवन जखमीक म्हापशेंच्या हॉस्पिटलांत दाखल केलो. थंय दोतोरांनी ताका मरण आयिल्ल्याचें जाहीर केलें. अपघाताचो पंचनामो पुलीस उपनिरिक्षक सुशांत सांगोडकार आनी हवालदार नरेंद्र शेट्ये हांणी केलो.
पुलिसांनी निश्काळजीपणान वाहन चलोवन सदोश मनीसवधाच्या आरोपा खाला गुन्यांव नोंद करून अपघातग्रस्त रिक्षा टेम्पो चालक दुबावीत आकाश सुरेश नायक (28, रा. सालईवाडी, सावंतवाडी) हाका अटक केल्या. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
