भांगरभूंय | प्रतिनिधी
फुडले मुख्यमंत्री म्हूण डी. के. शिवकुमार हांच्या नांवाचेर एकमत
खबरां संस्था
बंगळुरू : कर्नाटकाचे मुख्यमंत्री सिद्धरामय्या हांणी बिरेस्तारा आपल्या पदाचो राजिनामो दिलो. बंगळुरू घेतिल्ले पत्रकार परिशदेंत उलयतना तांणी सांगलें, जेन्ना हाय कमांड आपल्याक सांगतले तेन्न आपूण राजिनामो दितलों, अशें हाचे आदींच आपणे स्पश्ट केल्लें. बुधवारा हाय कमांडान तसो निर्देश दिलो आनी आयज आपणें आपल्या पदाचो राजिनामो सादर केला.
आपलें राजिनामो पत्र तांणी राज्यपाल थावरचंद गेहलोत हांच्या सचिवा कडेन दिलां, अशें तांणी ह्या वेळार सांगलें. राज्यपाल गेहलोत हे सध्या कुटुंबीक कारणांक लागून बंगळुरू भायर आसात. हे पत्रकार परिशदेंत उपमुख्यमंत्री डी. के. शिवकुमार हे लेगीत उपस्थीत आशिल्ले. पूण राज्याचो फुडलो मुख्यमंत्री कोण आसतलो, हे विशीं कसलीच म्हायती हे पत्रकार परिशदेंत उक्ती करूंक ना. ताचे आदीं सिद्धरामय्या हांणी आपव्. घरा मंत्रीमंडळांतल्या वांगड्यांची बसका घेतली आनी तांकां ह्या निर्णया विशीं कल्पना दिली. हे बसके वेळार डी. के. शिवकुमार हांणी सिद्धरामय्या हांच्या पांयांक हात लावन नमस्कार केलो. ते उपरांत दोनूय फुडाऱ्यांनी एकामेकांक वेंग मारली. मजगतीं, राज्याचे मंत्री एच. के पाटील हांणी सांगलें, डी. के. शिवकुमार हांच्या नांवाचेर एकमत जालां. तेच आतां कर्नाटकाचे फुडले मुख्यमंत्री म्हूण सुत्रां हातांत घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
