भांगरभूंय | प्रतिनिधी
कॉंग्रेस आनी आम आदमी पक्षाची मागणी
पणजी : गुन्यांव फांट्याचे कोठेंतल्यान पळून गेल्ल्या सिद्दिकी सुलेमानान व्हायरल व्हिडिओंत जांचीं नांवां घेतल्यांत तांकां कुशीक दवरून विंगड विंगड पंगडा वरवीं ह्या प्रकरणाचो खोलायेन तपास जावचो. तशेंच सुलेमान ज्या दिसा पळून गेलो त्या दिसाचे सगळे सीसीटीव्ही व्हिडियो पुलिसांनी प्रसारीत करचे, अशी मागणी कॉंग्रेस आनी आम आदमी पक्षाच्या फुडार्यांनी सोमारा पुलीस महासंचालक (डीजीपी) आलोक कुमार हांकां मेळून केली.
प्रदेश कॉंग्रेसीचे उपाध्यक्ष सुनील कवठणकार, म्हणयारे तुलियो डिसोझा, आपचे फुडारी वाल्मिकी नायक हांचो हातूंत वांटो आशिल्लो. सिद्दिकी पळपा फाटल्यान फक्त एकट्या अमित नायकाचोच हात ना. हातूंत पुलीस खात्यांतले उच्च पदार आशिल्ल्यांचो आनी राजकारण्यांचो निश्चीतूच वांटो आसा. ताका लागून स्वतंत्र पंगडा वरवीं ह्या सगल्यांची चवकशी जावची, अशें कवठणकार हांणी म्हणलें.
सिद्दिकी सुलेमानान पळ काडिल्ल्या प्रकरणांतल्यान राज्यांतली कायदो-सुव्यवस्था पुरायेन मुंगरल्या हें दिसून येता. हाची जापसालदारकी स्विकारून मुख्यमंत्री डॉ. प्रमोद सावंत हांणी पदाचो राजीनामो दिवचो तशेंच पुलिसांनी सुलेमानाक अटक करून तांचे वरवीं जमीन घोटाळे प्रकरणांत आसपाव आशिल्ल्या राजकारण्यांचो सोद घेवचो अशी मागणीय कंवठणकार हांणी केली.
मजगतीं, पुलिसांनीच आपल्याक हुबळी हाडलो आनी एन्कावंटर करपाची धमकी दिवन सोडलो. आपल्याक हुबळी सोडपाक बारा पुलिसांचो आसपाव आसा. हांव गोंयां परत येवपाक तयार आसा. मात सीबीआय वरवीं ह्या प्रकरणाचो तपास जावपाक जाय, अशी मागणी सिद्दिकी उर्फ सुलेमान खानान व्हिडियो वरवीं केली. ताणें ह्या व्हिडियोंत कांय पुलीस अधिकारी आनी एका आमदाराचेरूय नांव घेवन आरोप केल्यात. काल कवठणकार हांणी पत्रकार परिशद घेवन सिद्दिकीचो व्हिडियो प्रसार माध्यमां मुखार प्रसिद्ध केल्लो. उपरांत तो खूब व्हायरल जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
