भांगरभूंय | प्रतिनिधी
पणजी : पुलीस बंदखणींतल्यान फरारी जाल्लो सिद्दिकी सुलेमान खान हाका अटक करप हेंच पुलिसांचें सध्याचें उद्दीश्ट आसा. उपरांत ताणें व्हायरल व्हिडियोंत केल्ल्या आरोपांची चवकशी करतले, अशें पुलीस महासंचालक अलोक कुमार हांणी आयज सांगलें.
जमीन हडप प्रकरणांतलो मुखेल सुत्रधार सिद्दीकी सुलेमान खान हाणें पुलीस कोठयेंतल्यान पळ काडिल्ल्यान पुलिसांचेर बरोच पेच आयला. ज्या कॉन्स्टेबलाचे मजतीन सिद्दिकीन पळ काडलो त्या अमीत नायकाक पुलिसांनी अटक केल्या. बंदखणींत फिनेल पियेवन आत्महत्त्या करपाचो यत्न केले उपरांत ताका जीएमसींत दाखल केला. सिद्दिकीचो व्हिडीयो आयतारा रातीं व्हायरल जालो. पुलिसांनीच आपल्याक एन्कावंटराची धमकी दिवन हुबळी हाडून सोडिल्ल्याचो आरोप ताणें ह्या व्हिडीयोंत केला. पुलीस अधिकारी, आमदाराचें नांवूय घेतलां. हाचे उपरांत सोमारा आप शिश्टमंडळान पुलीस महासंचालकांची भेट घेतली.
अलोक कुमार हांणी सांगलें, पळून गेल्ल्या सिद्दिकी सुलेमान खानाचो डीआयजी रेंजच्या मार्गदर्शना खाला विवीध पंगडां वरवीं ताचो सोद घेतात. ताणें केल्ले आरोप हो लिपून रावपा खातीरचो डाव आशिल्ल्याची शक्यताय न्हयकारूं येना. सिद्दिकी हो गुन्यांवकार. चार वर्सां तो फरारी आशिल्लो. प्रकरणाची चवकशी सुरू आसा. ताच्या आरोपांचेर कितलो मेरेन विस्वास दवरपाचो हो प्रस्न आसा. अटक करून चवकशी केले उपरांत आरोपांतलें खरें कितें ते मुखार येवपाक मजत जातली, अशें पुलीस महासंचालकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
