भांगरभूंय | प्रतिनिधी
सिडनी, खबरां संस्था : ऑस्ट्रेलियेंतल्या सिडनी शारांतल्या मॉलांत आयज शेनवारा दनपरां सुरी हल्लो जालो. हातूंत 6 जाणांक मरण आयिल्ल्याची खबर आसा. मरप्यांचो आंकडो वाडपाची शक्यताय आसा. तेच बरोबर जायते जाण जखमी जाल्यात. हातूंत ९ म्हयन्यांच्या भुरग्याचो आस्पाव जाता. बीबीसीच्या खबरां प्रमाण, पुलिसांच्या फारपेटांत हल्लेखोर मेला.
मॉलांत एक मनीस सुरी घेवन भोंवतालो अशी म्हायती पुलिसांक मेळ्ळी. पुलिस मॉलांत पावतकच हल्लो करप्यान जायत्या जाणांक चाकू मारलो. ताका आडावपा खातीर पुलिसांनी फारपेट केलो. एक गुळी हल्लेखोराक लागली आनी ताका मरण आयलें.
कारण स्पश्ट जावंक ना
पुलीस आयुक्त अँथनी कुक हांणी सांगलें, ‘हल्लेखोर एकटोच मॉलांत भितर सरलो. ताचे वांगडा कोणूच नासलो. देखून कसल्याच प्रकारच्या हल्ल्याची भिरांत ना. हल्लेखोराची कांयच म्हायती मेळूंक ना. हेतू कितें ताचे विशींय म्हायती ना.
प्रधानमंत्री आल्बानीसान दुख्ख उक्तायलें
ऑस्ट्रेलियेचे प्रधानमंत्री अँथनी आल्बानीसाक हे विशीं दुख्ख उक्तायलां. तांणी म्हणलें, ‘हल्ल्यांत जायत्या जाणांक मरण आयलां. तांच्या कुटुंबाक आमचें दुख्ख. मजत केल्ल्या पुलिसांचे आनी हाजीर आशिल्ल्या लोकांचे आमी उपकार मानतात.’
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
