भांगरभूंय | प्रतिनिधी
भारताची स्टार बॅडमिंटन खेळगडी पी व्ही सिंधू हिचो बाबत फॉर्म ऑल इंग्लंड बॅडमिंटन वस्तादपण सर्तींत लेगीत चालूच उरलो. काल जाल्ले पयले फेरयेंत तिका चीनाचे झांग यी मेन कडल्यान सरळ गेमींनी हार घेवची पडली.
संवसारीक क्रमवारींत णवे सुवातेर आशिल्ली आनी दोन खेपे ऑलिम्पीक पदक जैतिवंत सिंधूचें आव्हान 39 मिनटांनी 17-21 आनी 11-21 फरकान सोंपलें. अंदूंच्या हंगामांत सिंधू तिसरे खेपे पयले फेरयेंत हारली. जानेवारींत मलेशिया ओपनांत स्पेनाचे कॅरोलिना मारिना आड हारिल्ली, जाल्यार इंडियन ओपनाची पयली फेरी लेगीत तिका हुपपाक जमूंक नाशिल्ली.
सिंधून हालींच कोरियाचो आपलो प्रशिक्षक पार्क ताए संगाक पदा वयल्यान काडिल्लो. ताच्याच मार्गदर्शनाखाला सिंधून टोकियो ऑलिम्पिकांत कांश्या पदक जिखिल्लें.
मजगतीं, काल सिंधू मातूय फॉर्मांत दिसूंक ना. दुसरे वटेन संवसारीक क्रमवारींत 17वे सुवातेर आशिल्ली झांग यी चड बरी खेळ्ळी. हे मॅची पयलीं दोगांयचो एकामेका आडचो रॅकॉर्ड 1-1 असो आशिल्लो.
पयले गेमीचे सुरवातीक सिंधून 6-5 अशी आघाडी घेतिल्ली आनी उपरांत 16-13 केली पूण, चिनी खेळगडयेन सेगीत सात गूण मेळोवन 20-16 अशी आघाडी घेतली आनी उपरांत 21 मिनटांनी पयली गेम आपल्या नांवार केली.
दुसरे गेमींत दोनूय खेळगडयो सुरवातीक 5-5 अश्यो बरोबरींत आशिल्ल्यो. पूण, सिंधून कांय चुकी केल्यो आनी तिचें तिका लुकसाण जालें. रोखडीच ती झांग यी कडल्यान 5-10 फाटीं पडली. ते उपरांत तिका मॅचींत पुनरागमन करपाक जमलें ना आनी दुसरी गेम आनी मॅच हारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
