भांगरभूंय | प्रतिनिधी
पर्यटन संचालक सुनील अंचिपका हांची म्हायती
पणजी, प्रतिनिधीः ह्या वर्सा 25 ते 27 मेरेन संवसारीक पर्यटन दिस मनयतले. पर्यटन आनी शांती हो ह्या वर्साच्या संवसारीक पर्यटन दिसांचो विशय आसतलो. रिजनरेटिव्ह पर्यटन खाला सुमार सप्तकर साहसी आनी गांवगिऱ्या पर्यटनांक उर्बा दिवपी कार्यावळी घडोवन हाडटले, अशी म्हायती पर्यटन संचालक सुनील अंचिपका हांणी दिली.
27 वेर संवसार भर संवसारीक पर्यटन दिस मनयतात हे फाटभुयेंर पर्यटन खात्याचे संचालकान ह्या दिसाच्या कार्यावळी वीशीं पत्रकार परिशदेत म्हायती दिली. ह्या वेळार टीटीएजीचे अध्यक्ष जॅक सुखिजा आनी स्काल गोंयचे प्रतिनिधी हजर आशिल्ले.
स्काल आनी टीटीएजी हांचे जोडपालवान पर्यटन खाते भागधाराकांबरोबर हो दिस मनयतले. ह्या दिसा आमचे पुराय लक्ष रिजनरेटीव पर्यटनाचेर दिला. साहसी आनी गांवगिरे पर्यटन ह्या दिसाचे खाशेले पण आसतले. पर्यटन आनी शांती हो ह्या वर्साचो विशय आसा आनी ह्या विशयाक पाळो दिवन आमी हो निर्णय घेतला, अशें अंचिपका हांणी सांगले.
24 सप्टेंबराक आंतरराष्ट्रीय हॉटेल मॅनेजमेंन्ट संस्थेत गोंयचे खाद्यपदार्थ रांदपाची सर्त दवरतले. जेन्ना आमी देशभर वा देशा भायर रोड शो आनी इव्हेंट करताले तेन्ना गोंयच्या जिनसांक पसंती मेळटाली. तशेंच संवसारभर शिकपी गोंयच्या विद्यार्थ्यांचो पर्यटन क्लब तयार केला आनी ह्या क्लबांक संवसार भर हे कार्यावळीचो प्रचार करपाक सांगतले, अशें तांणी सांगलें.
25 वेर आमी सगल्या भागदारकांची महत्वाची बसका घेतले. वॉटर स्पोर्ट्स, स्पायस प्लांटेशन, भलयाकी पर्यटन तशेंच पारंपारीक शॅक वेवसायीकां खातीर टीटीएजी आनी स्काल आवटरीच कार्यावळ घडोवन हाडून तांची समस्या जाणून घेतले. तशेंच 100 विद्यार्थ्यांचो आस्पाव आशिल्ले 26 पर्यटन क्लबाची राजभवन दरबार हॉलात बसका जातली. हे बसके वेळार पर्यटन खात्यांक फुडें कशें मुखार व्हरपाक मेळटा हे कल्पनेचे देणे-घेणे जातले. जाल्यार 27 वेर सगळे पर्यटक भागधारक नंदनवन फार्म खांडेपारा संसारीक पर्यटन दिस मनयतले, अशी म्हायती अंचिपका हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
