भांगरभूंय | प्रतिनिधी
पणजी : साश्ट म्हाल आतां पयलींचो उरूंक ना. नावेली सारख्या मतदारसंघात भाजपाचो उमेदवार वेंचून येवप हातूंत ही गजाल स्पश्ट जाता. साश्ट आतां पयली सारखो काँग्रेसीचो बालेकिल्लो उरूंक ना अशें पर्यावरण मंत्री अालेक्स सिक्ववेरा हांणी सांगलें.
प्रुडंट मिडियाच्या हेड ऑन कार्यावळींत पर्यावरण मंत्री अालेक्स सिक्वेरा हांणी हें उलाेवप केलें. नुवें मतदारसंघांत भाजपाक हांव आघाडी मेळोन दितलों असो विस्वास तांणी उक्तायलो. साश्ट म्हाल आतां पयलींचो उरूंक ना. साश्ट म्हालांतलो हांव व्हड फुडारी न्हय. तरी लेगीत दक्षीण गोंयांत भाजप उमेदवार वेचून येतलो. दिगंबर कामत, उल्हास तुयेंकार अशें फुडारी साश्ट म्हालांत आसात. तशेंच रवी नायक, सुभाष शिरोडकार अशें मंत्री आसात. सगले फुडारी आनी कार्यकर्ते भाजप उमेदवारा खातीर वावुरतले. हाका लागून दक्षीण गोंयांत भाजपाचे जैत निश्चीत आसा.
काँग्रेस आनी आम आदमी पक्ष एकठांय आयिल्ले आसले तरी भाजपाक ताचो फटको बसचो ना. फाटले विधानसभा वेंचणुकेंत काँग्रेस तशेंच आम आदमी पक्ष आशिल्लो. भाजपाक 20 जागे मेळ्ळे. साश्ट म्हाल हो काँग्रेसीचो बालेकिल्लो आसा जाल्यार फाटले विधानसभा वेंचणुकेंत साश्ट म्हालांत काँग्रसीक कितल्यो सुवाती मेळ्ळ्यो? असो प्रस्न तांणी केलो.
भाजप प्रवेशाक लागून मतदारसंघाची उदरगत
वेंचणुके वेळार हांवें कार्यकर्ते तशेंच लोकांक बरीच आस्वासनां दिल्लीं. हीं आस्वासनां पुराय करप काँग्रेस पक्षांत रावन शक्य नाशिल्लें. मतदारसंघाची उदरगत तशेंच लोकांचीं कामां करपा खातीर हांवें भाजपांत प्रवेश करपाचो निर्णय घेतलो. हो निर्णय बऱ्याच प्रमाणांत लावकारी थारला. नुवें मतदारसंघांतले बरेच तरणाटे वीज खात्यांत कंत्राटी पद्दतीचेर काम करताले. ह्या तरणाट्यांक वीज खात्यांत कायम करप शक्य जालें. मुख्यमंत्री डॉ. प्रमोद सावंत तशेंच भारतीय जनता पक्षाच्या सहकार्याक लागून मतदारसंघ तशेंच मंत्रीपदाक न्याय दिवप म्हाका शक्य जाता, अशें तांणी सांगलें.
पर्यावरण मंत्री म्हूण दर्यादेग वेवस्थापन आराखडो चालीक लावपाचे आव्हान आसा. ह्या आराखड्यांत कांय चुको आसात. न्यायालयांत याचिका आसा. न्यायालयाच्या आदेशांचो विचार करून सीझॅडएमपी तशेंच सीआरझॅडचे विशय सुटावे करचे पडटले. अस्तंत घांट अधिसुचोवणी, सीझॅडएमपी हे विशय मुख्यमंत्री डॉ. प्रमोद सावंत हांणी केंद्रा कडेन मांडल्यात, अशें सिक्ववेरा हांणी सांगलें.
आरजी प्रादेशीक पक्ष, विधानसभे पुरतो मर्यादीत
आरजी पक्षान लोकसभेक उमेदवार घालपाचो निर्णय घेतला. हाचो भाजपाक कसलोच फरक पडचो ना. आरजी हो प्रादेशीक पक्ष आसा. विधानसभा आनी लोकसभा वेंचणुकेंत बरोच फरक आसता. आरजीक विधानसभेक मतां मेळ्ळीं आसलीं तरी लोकसभेंत मतां मेळपाची शक्यताय उणी आसा. फुडाराक आरजी पक्ष काँग्रेसींत सुद्दा विलीन जावप शक्य आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
