भांगरभूंय | प्रतिनिधी
दादल्यांचें 67.51, बायलांचें 75,04 जाल्यार तृतीय पंथियांचें 100 टक्के मतदान
भांगरभूंय । प्रतिनिधी
मडगांवः दक्षीण गोंयांत खंयचो उमेदवार जिखतलो हें साश्ट म्हाल थारयता, अशें म्हणटात. साश्टींतल्या मतदारांची आंकडेवारी पळयत जाल्यार दादल्यांनी 67.51 जाल्यार बायलांनी 75.04 टक्के मतदान केलें. हाचो अर्थ बायलांनी दादल्यां परस 7.5 टक्के चड मतदान केलें. मडगांवच्या चारूय तृतीय पंथियांनी मतदान केल्ल्यान ही टक्केवारी 100 जाली.
दक्षीण गोंयांतल्या 5,98,767 मतदारां मदल्या 4,45,916 मतदारांनी मतदान केलें. ही टक्केवारी 76.06 टक्के जाता. हातूंत साश्टीचो विचार केलो जाल्यार 2009 त 66.88, 2014 त 68.09 टक्के मतदान जाल्लें. आतां तातूंत वाड जावन 74.47 टक्के मतदान जालां. सादारण 6 ते साडेस टक्के मतदानांत वाड जाल्या. ही वाड निर्णायक थारपी आसा.
नुवें मतदारसंघांत 28,502 मतदार आसात. तातूंतल्या 20,160 मतदारांनी मतदान केल्ल्यान 70.73 टक्के मतदान जालां. 13,100 दादले मतदारां मदल्या 8,580 (65.49 टक्के) जाणांनी जाल्यार 15,402 महिला मतदारां मदल्या 11,580 (75.18 टक्के) मतदारांनी मतदान केलें. कुडतरींत 30,513 मतदारांतल्या 21,823 मतदारांनी मतदान केल्यान 71.52 टक्के मतदान जालें. वट्ट 14,634 दादले आनी 15,879 महिला मतदारां मदल्या 9,954 दादले (68.01) आनी 11,869 (74.74) महिला मतदारांनी मतदान केलें.
फातोड्डें मतदारासंघांतल्या 31,036 मतदारां मदल्या 22,951 मतदारांनी मतदान केलें. ही टक्केवारी 73.95 टक्के जाता. 14,686 दादले मतदारांतल्या 10,721 (73 टक्के) जाल्यार 16,350 बायलां मदल्या 12,230 (74.80 टक्के) मतदारांनी मतदान केलें.
मडगांवां 14,721 दादले मतदारां मदल्या 10,784 (73.25 टक्के) आनी 15,544 बायलां मदल्या 11,513 (74.06 टक्के) जाणांनी मतदान केलें. मडगांवां चार तृतीतपंथी मतदारांची नोंद आसा. त्या सगळ्यांनी मतदान केलें. 30,269 मतदारां मदल्या 22,301 मतदारांनी मतदान केल्यान 73.68 टक्के मतदान जालें.
बाणावलेच्या 29,134 मतदारां मदल्या 19,954 जाणांनी मतदान केलें. हें 68.49 टक्के मतदान जालें. 13,747 दादले मतदारां मदल्या 8,711 (63.36 टक्के) आनी 15,387 महिला मतदारां मदल्या 11,243 मतदारांनी (73.06 टक्के) मतदान केलें.
नावेलीच्या 29,029 मतदारां मदल्या 20,765 जाणांनी मतदान केलें आनी 71.53 टक्के मतदान जालें. 14,234 दादले मतदारां मदल्या 9,637 जाणांनी (67.70 टक्के) जाल्यार 14,795 महिला मतदारां मदल्या 11,128 जाणांनी (75.21 टक्के) मतदान केलें.
कुंकळ्ळीच्या 14,070 दादले मतदारांतल्या 9,430 जाणांनी (67.02 टक्के) आनी 15,584 महिलां मतदारांतल्या 12,074 मतदारांनी (77.47 टक्के) मतदान केलें. वट्ट 29,654 मतदारां मदल्या 21,504 मतदारांनी मतदान केलें. ही टक्केवारी 72.52 टक्के इतली जाता.
वेळ्ळीत वट्ट 31,700 मतदारां मदल्या 22,019 जाणांनी मतदान केलें. हें 69.46 टक्के मतदान जालें. 14,947 दादले मतदारां मदल्या 9,310 जाणांनी (62.28 टक्के) जाल्यार 16,753 महिला मतदारांतल्या 12,709 जाणांनी (75.86 टक्के) मतदान केलें.
दक्षीण गोंयांत 74.47 टक्के मतदान जालें. तातूंत 72.38 टक्के दादले मतदारांनी आनी 76.43 टक्के महिला मतदारांनी मतदान केलें. तशेंच तृतीयपंथियांच्या मतदानाची टक्केवारी 77.77 टक्के आसा. तेचवरी साश्टींतल्या दादले मतदारांची मतदानाची टक्केवारी 67.51 टक्के जाल्यार महिला मतदारांच्या मतदानाची टक्केवारी 75.04 टक्के आसली. बदल घडोवपाची तांक महिला मतदारां मदीं आसा, अशें म्हणटात. साश्टी सारक्या म्हत्वाच्या म्हालांतली महिला मतदारांची वाडिल्लें मतदान जैतवंत उमेदवारा खातीर पोशक आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
