भांगरभूंय | प्रतिनिधी
रानसाद संघटणे वतीन आयोजन; गिरेस्त दायज सांबाळपाचो उलो
भांगरभूंय । प्रतिनिधी
सावयवेरें: फोंडें म्हालांतल्या बेतकी- केरीचे रानसाद संघटणे वतीन शिगमो उत्सवांत परंपरीक मांडजत सादरीकरण कार्यावळीचें आयोजन केलां. हें सादरीकरण आयतारा 7 एप्रीलाक दनपारां 3 वरां सावन सुरू जातलें. ही कार्यावळ सावयवेरेंच्या पंचायत मैदानार जातली, अशी म्हायती संघटणेचे सचीव दिलीप पालसरकार आनी अध्यक्ष खुशाली तळकार हांणी पत्रकार परिशदेंत दिली. ही पत्रकार परिशद पालसरे- केरी जाली.
ह्या वेळार माचयेर उपाध्यक्ष राजेश सावयकार, भांडारी उमेश नायक, जोडभांडारी संतोष नायक, वांगडी पांडुरंग नायक, मोहन नायक, भालचंद्र सतरकार, नितीन नायक, रोहिदास नायक आनी तुषार सतरकार हाजीर आशिल्ले.
हे कार्यावळीचो उद्देश स्पश्ट करतना सचीव दिलीप पालसरकार हांणी सांगलें, रानसाद संघटणा ही समाजीक मळा वयल्यो विवीध समस्या सोडोवचे खातीर तशेंच गोंयची परंपरीक सांस्कृतीक गिरेस्तकाय तिगोवन दवरचे खातीर 2019 त स्थापन जाली. अंत्रूज म्हालाची हो सांस्कृतीक खण म्हूण वळख आसा. शिगम्यांतले परंपरीक मांडजतीचें संकलन, सांबाळ आनी संवर्धन करप ही काळाची गरज आसा. कारण आमची संस्कृती हीच आमची खरी वळख आसा. सैमाच्या आलाशिऱ्यांत आनी पुर्वजांच्या आशिर्वादान लोककलेचें दायज फुडें व्हरचे खातीर ह्या तिसऱ्या मांडजत सादरीकरणाचो सुवाळो आयोजीत केला. संघटणेच्या पदाधिकाऱ्यांनी प्रियोळ मतदारसंघ आनी हेर कांय मतदारसंघांतल्या दरेका मांडांक प्रत्यक्ष भेट दिली आनी वट्ट 28 पंगडांनी सध्या नांवनोंदणी केल्या, अशी म्हायती तांणी दिली.
ही जत सादर करचे खातीर खंयच्याच भेसाचें वा वेळाचें वा हेर कसल्याच नेम- अटींचो आस्पाव ना. कारण जर ह्या जतींक बंधनाचे फास्केंत दवरली जाल्यार ती खऱ्या अर्थान पुर्णत्वाक येवची ना. आदल्या काळार मनरिजवणेचें साधन नाशिल्ल्यान कश्टकरी समाज जे तरेन मांडार सामको मेकळ्यापणान जतीचें सादरीकरण करतालो, तेच पद्दतीन हे कार्यावळींत लेगीत जतीचें सादरीकरण जावचें, अशी अपेक्षा दिलीप पालसरकार हांणी सांगलें.
हे कार्यावळींत विवीध वाठारांतल्या विवीध तरेच्या जतींचें सादरीकरण जातलें. लोकांनी ताचो आस्वाद घेवचो, अशें भांडारी उमेश नायक हांणी मागलां. रानसाद संघटणेंत तरणाट्यांचो खुबूच उणाव आसा. ते खातीर चडांत चड तरणाट्यांनी हे संघटणेंत वांगडी म्हूण नांवनोंदणी करची आनी आमची ही सांस्कृतीक गिरेस्तकाय तिगोवन दवरची, असो उलो पांडुरंग नायक हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
