सावधान ! कोरोनाचें मोड घुंवता !!

भांगरभूंय | प्रतिनिधी

ब्रिटनांत सप्तकांत 300 ते 500 दुयेंती
जगांत आतां मेरेन 66 कोटी 53 लाखांक कोरोना

चीना उपरांत आतां कोरोनाक लागून ब्रिटनांत परिस्थिती वायट जाल्या. सप्तकांतल्यान 500 जाणांक आपत्कालीन सेवा मेळनाशिल्ल्यान मरण येता, अशें ब्रिटीश भलायकी खात्याच्या एका वरिश्ठ अधिकाऱ्यान सांगलें. हॉस्पिटलांनी खाटींचो उणाव आसा. 99 वरां उपचाराची वाट पळोवपाची पडटा. खरें म्हणल्यार ब्रिटनांत वाडत वचपी कोरोना दुयेंतींक लागून धोक्याचें फ्लू दुयेंस पातळपाक लागलां.

‘द गार्डियना’च्या मतान ब्रिटनांत दर सप्तकांत 300 ते 500 लोकांक मरण येता, अशें रॉयल कॉलेज ऑफ इमर्जन्सी मेडिसिनचे डॉ. एड्रियन बॉयल हांणी सांगलां. वेळार उपचार जावंक नाशिल्ल्यान अशें जाता. हॉस्पिटलांनी दुयेंतींची गर्दी आसा. नोव्हेंबराचे तुळेंत डिसेंबरांत हॉस्पिटलांत दाखल जावपाक 12 वरां परस चड वाट पळोवपी लोकांची संख्या 355 टक्क्यांनी वाडिल्ली. स्विंडनांतल्या ग्रेट वेस्टर्न हॉस्पिटलांत अपघात आनी आपत्कालीन दुयेंतींनी 4 दीस (99 वरां) स्ट्रेचराचेर काडले.
हाँगकाँगात दिसाक 2 लाख
हाँगकाँग 8 जानेवारी सावन चीना वटेनची आपली शिम उक्ती करपाक शकता. हें धोक्याचे थारपाची भिरां आसा, अशें तज्ज्ञांचें म्हणणें. दर दिसा हांगां 2 लाख दुयेंती मेळपाक लागल्यात. शिम उक्ती जाले उपरांत हो आंकडो वाडूंक शकता. परिस्थिती वायट जायत आसा. कोरोना वाशिनाचे तीन डोस घेतिल्ल्यांकूय मरण येवपाक लागला. अशें आसून लेगीत सरकार शिमो उक्ती करपाचो विचार करता, म्हूण लोक बेजार आसात.

भारतीयाक चीनांत मरण
तमिळनाडूचो वैजकी विद्यार्थी अब्दुल शेख हाका चीनांत मरण आयलें. मरणाचे कारण दुयेंस अशें म्हण्टात तरी तें कसलें हें स्पश्ट सांगिल्लें ना. अब्दुलाची कूड परत हाडपाक कुटुंबान परराश्ट्र मंत्रालया कडेन मजत मागल्या. अब्दुल फाटलीं पांच वर्सां चीनांत वैजकी शिक्षण घेतालो. 11 डिसेंबराक तो भारतांत आयलो. पूण, परतून चीनांतल्या क्विहाराक इंटर्नशीपा खातीर परत गेलो. ‘इंडिया टुडे’ च्या अहवाला प्रमाण अब्दुलान थंय 8 दिसांचो क्वारंटायन काळ पुराय केल्लो. दुयेंत पडले उपरांत अब्दुल शेख हाका आयसीयूंत दाखल केलो, पूण ताका मरण आयलें.
13 देशांचे प्रवाशांचेर निर्बंध
आतां मेरेन 13 देशांनी चीनांतल्यान येवपी प्रवाशांचेर बंदी घाल्या. तातूंत ऑस्ट्रेलिया, कॅनडा, मोरोक्को, फ्रान्स, ब्रिटन, स्पेन, यूएसए, जपान, इस्रायल, भारत, इटली, दक्षिण कोरिया आनी पाकिस्तान हांचो आस्पाव आसा. तैवानान चीनांतल्यान येवपी लोकां खातीरय कोविड चांचणी करप सक्तीचें केलां. चडशा देशांनी चीनांतल्यान आयिल्ल्या प्रवाशांक कोरोनाचो निगेटिव्ह चांचणी अहवाल दाखोवचो पडटलो. मोरोक्कोन 3 जानेवारी सावन चीनांतल्यान येवपी लोकांचेर बंदीच घाल्या.
66 कोटी 53 लाख दुयेंती
कोरोना वर्ल्डोमीटरा प्रमाण, संवसारांत आतां मेरेन 66 कोटी 53 लाख 36 हजार 842 दुयेंती सांपडल्यात. हो आंकडो वाडत आसा. 11 जानेवारी 2020 दिसा चीनांतल्या वुहान शारांत 61 वर्सां पिरायेच्या मनशाक मरण आयलें. संवसारांतलो कोरोनाक लागून मरण आयिल्लें हो पयलो मनीस. हाचे उपरांत मरणां वाडूंक लागलीं. आतां मेरेन 66 लाख 98 हजार 470 जाणांक मरण आयलां.