सावंतवाडी अपघातांत तिगांक मरण

भांगरभूंय | प्रतिनिधी

घोव, भयणी सयत गिरीच्या पंचाचो मरण आयिल्ल्यां मदीं आस्पाव

चालकाक लकणी आयिल्ल्यान आपअपघात

गिरी साळगांवचेयै एकाच कुटुंबांतले पांच जाण वताले भिरवंडे

भांगरभूंय । प्रतिनिधी

म्हापशें : कणकवले मावशेक घरा पावोवपा खातीर वचपी नानोडकार कुटुंबीयांचे थार मोटारीक भिरांकूळ आपअपघात जालो. मोटार खोल देगणांत पडिल्ल्यान गिरी, म्हापशेंची श्रीमती पांडुरंग नानोडकार (58), घोव पांडुरंग विष्णू नानोडकार (65) आनी तिची खाशा भयण विलासिनी जगन्नाथ सातार्डेकर (54. रा. भिरवंडे-कणकवली) ह्या तिगांक मरण आयलें. जाल्यार सनी नानोडकार (36) आनी उज्वला नारायण कांबळी (48) हे दोगूय गंभीर जखमी जाले.

मरण आयिल्ली श्रीमती नानोडकार ही गिरी पंचायतीच्या प्रभाग 1 ची सध्याची पंच आशिल्ली. जाल्यार तिचो पूत जखमी सनी नानोडकार हो प्रभाग 5 चो पंच आसा. ह्या भिरांकूळ अपघातांत नानोडकार जोडप्याक मरण आयिल्ल्यान सर्वेवाडो आनी गिरी गांवांत दुख्खाचें वातावरण पातळ्ळां.

मुंबय- गोंय म्हामार्गा वयल्या नेमळेच्या एरंडवाकवाडी वाठारांत सोमारा 22 जूनाक दनपारां 2.15 वरांच्या सुमाराक हो भिरांकूळ अपघात जालो. धोफरायत वचपी थार जिपीचो चावक सनी नानोडकार हाचो गाडये वयलो ताबो सुटिल्ल्यान ती रस्त्याचे कुशीक सुमार 15 ते 20 फूट खोल देगणांत पडली. ह्या अपघातांत मोटारीचो खुर्दो जालो आनी मोटारींत आशिल्ल्या पांच मदल्या श्रीमती आनी विलासिनी ह्या दोगां खाशा भयणींक सुवातेचेरूच मरण आयलें. जाल्यार पांडुरंग नानोडकार हाका बांबोळे जीएमसींत उपचार चालू आसतना सांजे वेळार मरण आयलें. जाल्यार जखमी सनी आनी उज्वला हांचेर जीएमसींत उपचार चालू आसात.

बार्देस म्हालांतल्या गिरी पंचायतीची सध्याची पंच, तिचो घोव आनी खाशे भयणी सयत तिगांक मरण आयलें जाल्यार हेर दोग गंभीर जखमी जाले. हे घडणुकेक लागून गिरी गांवांच दुख्खाची सया पातळ्ळ्या आनी नानोडकार कुटुंबीयांचेर दुख्खाचो दोंगर कोसळ्ळा.

सोमारा दनपारां गिरी, म्हापशें सावन जीए 03 एएम 8478 नंबराचे थार जिपीन पंच सनी नानोडकार हे सिंधुदुर्ग जिल्ह्यांतल्या कणकवलीच्या भिरवंडे आपले मावशेक पावोवपाक वताले. तांचे वांगडा गाडयेंत मावशे सयत आवय- बापूय आनी एक सोयरी बायल आशिल्ली. दनपारां वयल्या वेळार तांची मोटार नेमळे वाठारांत पावली तेन्ना सनी नानोडकार हाका अचकीत लकणीं आयली. ताका लागून ताचो गाडये वयलो ताबो सुटलो आनी मोटार वेगान रस्त्या भायर वचून खोल देगणांत पडली.

ह्या अपघातांत गाडयेंतले सगले गंभीर जखमी जाले. अपघाता उपरांत सगल्यांत सावंतवाडीच्या उपजिल्हो हॉस्पिटलांत दाखल केले. मात दोतोरांनी जखमी श्रीमती नानोडकार आनी तिची खाशा भयण विलासिनी सातार्डेकार हांकां मरण आयिल्ल्याचें घोशीत केलें. जाल्यार हेर जखमींक फुडल्या उपचारा खातीर गोंयांत बांबोळेच्या जीएमसींत धाडले. मात थंय उपचार चालू आसतना पांडुरंग नानोडकार हांकांय मरण आयलें. हेर दोगांचेर उपचार चालू आसात. फुडलो तपास पुलीस निरिक्षक अमोल चव्हाण हांच्या मार्गदर्शना खाला सावंतवाडी पुलीस करतात.

*

मरण आयिल्ले पांडुरंग नानोडकार हे फाटलीं कितलीशींच वर्सां म्हापशें बाजारांत आंबे विक्रीचो वेवसाय करताले. आंब्याच्या मोसमा वेळार ते बाजारांत कवळेंकार हांच्या दुकाना मुखार बसून आंबे विकताले. सध्या तांचो पूत सनी नानोडकार हे हो वेवसाय सांबाळटालो. सध्या आंब्याचो मोसम निमाण्या पांवड्यार आशिल्ल्यान गिरी आयिल्ले मावशेक तिच्या घरा पावोवपा खातीर वतना हो अपघात जालो.

*

पंच सनी नानोडकार हे गिरीचे आदले सरपंच आसात. अंदूंचे पंचायत वेंचणुके वेळार सनी हांचो प्रभाग 1 हो बायलां खातीर राखीव जाल्ल्यान तांणी ह्या प्रभागांत आपली आवय श्रीमती हिका वेंचणूक रिंगणांत देंवयल्ली. जाल्यार तांणी स्वता प्रभाग 5 तल्यान वेंचणूक लडयली. हे वेंचणुकेंत आवय आनी स्वताक वेंचून हाडून सनी नानोडकार हांणी गिरी पंचायत राजकारणांत नवो विक्रम नोंद केल्लो.