साळगांवकार क्रिकेट क्लबाक वस्तादपण

भांगरभूंय | प्रतिनिधी

पयल्या डावांत घेतिल्ले आघाडीच्या नेटार जिनो क्रिकेट क्लबाक हारोवन साळगांवकार क्रिकेट क्लबान गोंय क्रिकेट संघटणेन आयोजीत केल्ली प्रिमीयर लीग क्रिकेट सर्तीचें वस्तादपण जोडलें.

पर्वरी क्रिकेट अकादमीच्या मैदानाचेर जाल्ले तीन दिसांची लडत बादाबाद उरली. मॅन ऑफ द मॅच पुरस्कार जिनो क्रिकेट क्लबाचो ऑफ स्पिनर मोहीत रेडकाराक फावो जालो. ताणें मॅचींत 157 धांवड्यो दिवन 13 विकेटी घेतल्यो. साळगांवकार क्रिकेट क्लबान पयल्या डावांत 382 धांवड्यो केल्ल्यो. ताका जाप दितना जिनो क्रिकेट क्लबान काल 8 बाद 251 धांवड्यां वयल्यान मुखार खेळपाक सुरवात केली आनी ताचो डाव 253चेर सोंपलो. अशे तरेन साळगांवकार क्रिकेट क्लबाक पयल्या डावांत 129 धांवड्यांची आघाडी फावो जाली. ते उपरांत मोहीत रेडकार आनी मुखेली दर्शन मिशाळ हांणी साळगांवकार क्रिकेट क्लबाचो दुसरो डाव 111चेर सोंपयलो. मोहीत रेडकारान 37 धांवड्यो दिवन 7 विकेटी घेतल्यो, जाल्यार दर्शन मिशाळान 50 धांवड्यो दिवन 3 बॅट्समनांक बाद केले.

दोनूय क्लबाचे मुखेली मॅच बादाबाद दवरपाक तयार जाले, त्या वेळा जिनो क्रिकेट क्लबान आपल्या दुसऱ्या डावांत 6 विकेटी वगडावन 92 धांवड्यो केल्ल्यो. साळगांवकारा खातीर लकमेश पावणेन 3 विकेटी घेतल्यो. साळगांवकाराचे पांच मॅचीतल्यान 25 गूण जाले. उप वस्तादपण जोडपी जिनोचे पांच मॅचींतल्यान 22 गूण जाले.

थोडे भितर धांवतकटोः साळगांवकार क्रिकेट क्लब, (पयलो डाव) 382, जिनो क्रिकेट क्लब (पयलो डाव) 253, साळगांवकार क्रिकेट क्लब, (दुसरो डाव) 38.3 ओव्हरींनी सगले बाद 111 (गौरेश कांबळी 13, आदित्य सुर्यवंशी 19, दीपराज गांवकार 23, गगनदीप 10 धांवड्यो, मोहीत रेडकार 7-37, दर्शन मिशाळ 3-50), जिनो क्रिकेट क्लब (दुसरो डाव) 19 ओव्हरींनी 6 बाद 92 धांवड्यो (पुखराज मान 30, मोहीत रेडकार 16, निसर्ग नागवेंकार नाबाद 19 धांवड्यो, सागर उदेशी 2-40, लकमेश पावणे 3-42, शिवम सिंग 1-9).