भांगरभूंय | प्रतिनिधी
वास्कोः वास्कोचे आमदार कृष्णा साळकार हांणी वास्कोचे आदले आमदार कार्लूस आल्मेदा हांची भेट घेतिल्ल्यान चर्चा सुरू जाल्या. साळकार आनी आल्मेदा हांची भेट हो धपकोतंत्राचो एक भाग बी न्हय मू, असो प्रस्न कांय जाणांक पडला.
साळकार हांणी हालींच आल्मेदा हांच्या घरा वचून तांची भेट घेतली. ते संबंदांत साळकार हांणी आपल्या फेसबुकार एक पोस्ट घातल्या. फाटले विधानसभा वेंचणुकेंत साळकार हांणी भाजपा जाल्यार आल्मेदा हांणी काँग्रेसी वतीन वेंचणूक लडयिल्ली. ताका लागून साळकार हांणी राजकी हेवेदावे कुशीक दवरून विकसीत भारता खातीर मोदी हांच्या व्हिजनाक तेंको दिवपाची विनवणी आल्मेदा हांकां केली. तांणी प्रधानमंत्री नरेंद्र मोदी हांचेर आदारीत 2.0 ही पुस्तिका आल्मेदा हांकां दिली. देशाचे उदरगती खातीर भाजपाच्या दक्षीण गोंय उमेदवाराक तेंको दिवपाची विनवणी साळकार हांणी आल्मेदा हांकां केली.
हे भेटी वेळार साळकार आनी आल्मेदा हांचे मदीं कसली चर्चा जाली तें कळपाक शकलें ना, पूण आपलीं दारां सगळ्यां खातीर उक्तीं आसात. कोणूय आपल्याक मेळपाक शकता, अशें आल्मेदा हांणी सांगलें.
साळकार हांणी सांगलें, आपणाक सगळ्यांक वांगडा घेवन वास्कोची उदरगत करपाची आसा. ताका लागून आपूण कसलोच मतभेद करिनासतना तशेंच मनांत कसलेंच वायटपण दवरिनासतना दरेकल्याची भेट घेतां. तातूंत आदले आमदार, आदले नगराध्यक्ष, आदले नगरसेवक- नगरसेविका आनी हेरांचो आस्पाव आसा. उरगतीच्या कामाचें जांकां स्रय दिवपाचें आशिल्लें तें तांकां दिलें. आपणे कोणाच कडेन दुस्मानकाय दवरूंक ना. दरेकल्यान उदरगतींत योगदान दिवपाक जाय. जेन्ना वेंचणूक येतली तेन्ना आमी आपापल्या पक्षां खातीर काम करतले. पूण आयज देशाचे उदरगती खातीर दरेकल्यान मतभेद कुशीक दवरपाची गरज आसा, अशें साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
