भांगरभूंय | प्रतिनिधी
पर्वरी पुलिशेंत गुन्यांव नोंद
म्हापशें: साडे चौदा वर्सां पिरायेचे सान सलयेचेर लिंगीक अत्याचार करून तिका गुरवार केल्ल्याच्या आरोपा खाला पर्वरी पुलिसांनी अनवळख्या दुबाविता आड गुन्यांव नोंद केला. हो लिंगीक अत्याचाराचो प्रकार फेब्रुवारी ते मे 2024 मजगतीं घडलो.
पिडीत चली आपल्या पालकां सयत गोंयांत राबित्याक आशिल्ली. तिच्या बापायची बदली मुंबयंत जाल्ल्यान हें कुटूंब मुंबयंत स्थायीक जालां.
मुंबय गेले उपरांत चलयेच्या पोटांत दुखूंक लागिल्ल्यान तिका पालकांनी दोतोरा कडेन व्हेली. तेन्ना तें स म्हयन्याचें गुरवार आशिल्ल्याचें दिसून आयलें. ताका लागून थळाव्या पुलिशेंत हें प्रकरण पावलें. हो एकंदरीत प्रकार गोंयांत घडिल्ल्याचें उक्तडार आयले उपरांत मुंबय पुलिसांनी शुन्य कलमा खाला हें प्रकरण नोंद करून पर्वरी पुलिसां कडेन हस्तांतरीत केलें.
ते प्रमाण पुलिसांनी भारतीय दंड संहितेच्या 376(2)(1), 376 (2)(2), 376(3), पोक्सो कायदो कलम 4, 6,8,12 आनी गोंय बाल कायदो कलम 8(2) प्रमाण गुन्यांव नोंद केला.
मजगतीं, ह्या प्रकरणांतलो दुबावीत आरोपी हो लेगीत सान पिरायेचोच आशिल्ल्याचें पिडिते बरोबरचे मुळावे चवकशेंत मुंबय पुलिसांक दिसून आयलां.
फुडलो तपास पुलीस निरिक्षक राहूल परब हांच्या मार्गदर्शना खाला प्रज्योती देसाय करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
