भांगरभूंय | प्रतिनिधी
पणजी, बातमीदार : दक्षीण गोंयांत स वर्सां पिरायेचे चलयेचेर लिंगीक अत्याचार केल्ले खातीर बाल न्यायालयान ४५ वर्सां पिरायेच्या आरोपीक ५ वर्सां बंदखण आनी २ लाख रुपया दंडाची ख्यास्त फर्मायल्या. बाल न्यायालयाचे अध्यक्ष सायोनारा लाड हांणी हो आदेश दिला.
पिडेस्त चलयेच्या सोयर्यांनी २०१८ वर्सा सांगें पुलीस स्टेशनाचेर कागाळ केल्ली. आरोपीन १७ जून २०१८ दिसा पिडेस्त चली घरा एकटीच आसतना तिचेर लिंगीक अत्त्याचार केले, अशें ते कागाळींत नमूद केल्लें. तेन्नाचे सांगें पुलीस उपनिरीक्षक मनोज मळीक हांणी हे कागाळीची दखल घेवन आरोप्या आड गुन्यांव दाखल केल्लो. उपरांत आरोपीक अटक केल्ली.
आरोपीक पयल्या न्यायालयान पुलीस बंदखण आयकयली. ती सोंपल्या उपरांत ताका न्यायालयीन बंदखणींत धाडलो. तपास पुराय करून पुलिसांनी आरोपी आड बाल न्यायालयांत आरोपपत्र दाखल केलें. पुरावे आशिल्ल्यान न्यायालयान आरोपीक ३ मार्चाक दोशी थारायलो. उपरांत न्यायालयान आरोपीक पाच वर्सांची बंदखण आनी २ लाख रुपया दंड, अशी ख्यास्त फर्मायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
