भांगरभूंय | प्रतिनिधी
-मदलो वाडो हांगच्या श्री देव गावडेवंश देवस्थानाचो १९ वो वर्धापन दीस सुवाळो अक्षय तृतीया म्हुर्ताचेर शुक्रार १० मे दिसा धर्मीक आनी सांस्कृतीक कार्यावळींनी मनयतले. ह्या निमतान सकाळीं ९ वरांक धर्मीक विधी सुरू जातल्यो. तशेंच दनपरां १ वरांचेर पावणी, महाप्रसाद जातलो. सांजेवेळार ६.३० वरांचेर सवायशिणींचो दिवजोत्सव आनी उपरांत रातच्या ९ वरांचेर तीन अंकी ‘काही तरी घडतंय इथं’ नाटक जातलें. ह्या नाटकाचे दिग्दर्शन विजय तुळसकार, नेपथ्य दादा हळदणकार, आवाजाची येवजण अविनाश सावंत, पार्श्वसंगीत देवाशिष गडेकार, प्रक्ष येवजण अर्जुन नायक हांची आसा. ह्या नाटकांत प्रकाश गावडे, महेश गोकरणकार, सुनील गावडे, आर्या गावडे, संकेत गावडे, अरुण गावडे,अजित मांजरेंकार, दिपक गावडे, महादेव गावडे, अमन गावडे, विघ्नेश गावडे आनी दिपाली राजन गावडे हांच्यो भुमिका आसात. तरी भाविकांनी तशेंच नाट्य रसिकांनी हाजीर रावन तिर्थप्रसादाचो लाव घेवचो असो उलो देवस्थानाचे महेश गावडे आनी प्रमोद गावडे हांणी मारला.
-आखाड्यावेल्या श्री सत्यनारायण मंदिराच्या प्रतिश्ठापनेचो १९ वो वर्धापन दीस १० मेक (अक्षय तृतीया) आनी ११ मेक विवीध धर्मीक आनी सांस्कृतीक कार्यावळींनी उमेदीन आनी भक्तीभावान मनयतले.
१० मेक सकाळीं धर्मीक विधी जातल्यो. दनपरां १२.३० वरांचेर महाआरत्यो, तिर्थप्रसाद आनी दनपरां १ वरांचेर महाप्रसाद जातलो. ह्या सुवाळ्याचे यजमान श्री मनोहर मंगेश फडते आनी स. माधवी मनोहर फडते जावन आसात. उपरांत सांजेवेळार ६ वरांचेर सवायशिणीं कडल्यान दिवजोत्सव जातलो. उपरांत रातच्या ९ वरांचेर ‘हॅलो ब्रदर’ हें कोंकणी नाटक सादर करतले.११ मेक रातच्या ९ वरांचेर वैभवी क्रिएशन दिवचल आनी अमर फाळकर प्रस्तुत ‘आयतो पयसो करता पिसो’ हें कोंकणी नाटक सादर करतले. भावीक आनी नाट्य रसिकांनी व्हडा संख्येन हाजीर रावन सुवाळ्याची सोब वाडोवची अशें श्री सत्यनारायण मंदिर समिती वतीन कळयलां.
-परम पुजनीय सद्गुरु ब्रह्मेशानंदाचार्य स्वामीजींच्या कृपाशीर्वादान शेनवार ता. १८ आनी आयतार ता. १९ मे २०२४ दिसा श्री राष्ट्रोळी महाविष्णु सभामंडप तळेखोल वाटुळवाडी हांगा श्री दत्त पद्मनाभ पीठ श्रीक्षेत्र तपोभूमी फोंडें गोवा-भारत संचालीत संत समाज घोटेली-केळावडे आनी शिवजयंती उत्सव समिती तळेखोल वतीन बाल संस्कार शिबिराचें आयोजन केलां. ह्या शिबिरा खातीर पिरायेची मर्यादा ६ ते १५ वर्सां अशी आसतली.
आमची संस्कृताय तिगोवपा खातीर पालकांनी आपल्या भुरग्यांक ह्या शिबिराक धाडचें. ह्या शिबिरांत पुराय दिसाची दिनचर्या, योग ज्ञान, श्लोक पठण, संस्कृत सुभाशीत, संस्कृत सामान्य ज्ञान, संस्कृत गीत, धुपारती तशेंच भुरग्यां खातीर खासा आवडपी खेळ ह्या शिबिरांत शिकयतले. शिबिरांत शिकोवपाक अणभवी शिक्षक आसतलें. चड म्हायती खातीर ९२६०६६९७६२ वा ८७६६५३७९२६ ह्या क्रमांकाचेर करचो असो उलो मारला.
-म्हाळशेकरवाडो पर्यें-सत्तरी हांगच्या श्री म्हाळसा देवीचो ३५ वो पुनः प्रतिष्ठापना वर्धापन दीस सुवाळो सोमार ता.१३ आनी मंगळार ता.१४ मेक धर्मीक, सांस्कृतीक आनी मनरिजवणेच्या कार्यावळींनी मनयतले. ह्या निमतान देवीची नित्य पुजा, उपरांत धर्मीक विधी, दनपरां १२ वरांचेर आरती, प्रसाद आनी म्हाप्रसाद जातलो. सांजे वेळार ५ वरांचेर म्हाळसा महिला भजनी मंडळाची भजनाची कार्यावळ, सांजेवेळार ७ वरांचेर दिवली नाच, रातच्या ८ वरांचेर ’स्वर मैत्रीचे’ ही संगीताची कार्यावळ जातली. रातच्या १० वरांचेर वेदांत क्रिएशन्स निर्मित मंगलमूर्ती कलाबहार भिरोंडा सत्तरी हांचें दोन अंकी कोंकणी विनोदी नाटक ’बुडकुल्याचो फार’ सादर करतले.
मंगळार ता. १४ एप्रिलाक देवीची पुजा, हेर धर्मी विधी, अभिशेक, आरती आनी महाप्रसाद जातलो. सांजेवेळार ६ वरांचेर थळाव्या कलाकाराची कार्यावळ, रातच्या १० वरांचेर अभिनय पणजी प्रस्तूत धमाल कोंकणी नाटक ’आमचो ढिंच्याक बाबा’ सादर करतले, अशें म्हाळशेकरवाड्या वयल्या ग्रामस्थां वतीन कळयलां. ह्या दोनूय कार्यावळींक व्हडा संख्येन भाविकांनी हाजीर रावचें असो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
