सानुल्यो खबरो

भांगरभूंय | प्रतिनिधी

बिरेस्तार १८ ते २१ एप्रील मेरेन शिखर कलशा सयत श्री जगदंबा लहराय देवी आनी महागणपतीचो पुनः प्रतिष्ठा महोत्सव जातलो. ह्या निमतान फाल्यां सकाळ सावन धर्मीक विधी सुरू जातले. तशेंच २० एप्रील मेरेन हांगा विवीध धर्मीक आनी सांस्कृतीक कार्यावळींचें आयोजन केलां.

• माशेल तारीवाडो हांगच्या श्री साईबाबा भक्त मंदिरा वतीन दर वर्सा प्रमाण अंदूंय २१ एप्रिलाक श्री साईबाबा भक्त मंदीर तारीवाडो ते मरड सांगोल्डा श्री राष्ठोळी साईबाबा मंदीर मेरेन पदयात्रेचें आयोजन केलां. २१ एप्रिलाक सकाळीं ५ वरांचेर धर्मीक विधी करून श्री साईबाबा भक्त मंदिरा कडल्या पदयात्रा सुरू जातली. वांटो घेवप्यांनी धवो कुर्ता, पायजमा, तोपी आनी बायलांनी शक्य आसल्यार धवे कपडे घालचे. इत्सुकांनी २० एप्रील मेरेन प्रताप वळवयकार ९८३४४६५३८९, सिध्दार्थ गाड ७३७८७०७६७६, राजु तारी ९६३७३६६५६५ हांचे कडेन संपर्क करचो असो उलो आयोजकांनी मारला.
• गोवा प्रदेश साने गुरुजी कथामाळेचो वर्सुकी कार्यकर्ता मेळावो आयतार २८ एप्रील दिसा सकाळीं ९ ते १२.३० मेरेन आनी वर्सुकी बसका दनपरां १२.३० वरांचेर गोंय कथामाळेच्या कार्यालयांत कृष्णा नानु नायक कार्यालय, २०१, राजदुर्गा हॅरिटेज फोंडें सा. बाधकाम खातें कार्यालया लागसारा जातली. ह्या वेळार मुखेल सोयरे म्हणून धेंपो कॉलेज ऑफ कॉमर्स ऍन्ड इकॉनोमिक्सचे प्राचार्य डॉ. मनोज कामत हे हाजीर आसतले.
• पर्ये-सत्तरीचे कवी लक्ष्मण गुरव हांच्यां पयल्या ’जीवनवाट’ ह्या काव्य संग्रहाचो प्रकाशन सुवाळो आयतार २१ एप्रिलाक सांजेच्या ३.३० वरांचेर केरी-सत्तरी युथ क्लबाच्या सभाघरांत आयोजीत केला. मुखेल सोयरे म्हणून केरी अर्बन कोऑपरेटिव्ह क्रेडीट सोसायटीचे अध्यक्ष चंद्रकांत पिसुर्लेकार, मुखेल वक्तो गोंय पर्यटन उदरगत महामंडळाचे उप वेवस्थापक दीपक नार्वेंकार, मानाचे सोयरे साहित्यीक ऍड. भालचंद्र मयेंकार, खासा सोयरे कवी महादेव गांवकार उपस्थित आसतले. ह्या कविता संग्रहाचेर गोपीनाथ गांवस भाश्य करतले.