भांगरभूंय | प्रतिनिधी
-मोलेंच्या अभिनव विद्यामंदिर माध्यमीक विद्यालय आनी मोलें शाळा समूह हांच्या जोड पालवान तशेंच भाऊसायब बांदोडकार शिक्षण संस्थेच्या भांगरा महोत्सवा निमतान २१ डिसेंबराक स्नेहसंमेलन आनी इनामां भेटवण सुवाळो आयोजीत केला. हो सुवाळो सांजे वेळार ४ वरांचेर विद्यालयाच्या आंगणांत जातलो.
-सावयवेरें वि.का.स. सेवा सोसायटी लिमिटेड हे संस्थेक अंदूं ६१ वर्सां पुराय जातात. ह्या निमतान आयतार २२ डिसेंबराक धावी आनी बारावेचे परिक्षेंत संस्थेच्या वांगड्यांच्या गुणेस्त विद्यार्थ्यांचो भोवमान सुवाळो आयोजीत केला. ज्या विद्यार्थ्यांक २०२३ – २४ च्या धावी आनी बारावेचे परिक्षेंत ७० टक्क्यां परस चड गूण मेळ्ळ्यात, अशा वांगड्यांनी आपल्या भुरग्यांची गुणपत्रिका, सभासद नंबर आनी फोटो २० डिसेंबर मेरेन संस्थेच्या कार्यालयांत हाडून दिवचे, अशें संस्थेचे अध्यक्ष डॉ. दत्ताराम देसाय हांणी कळयलां.
-सडा अर्बन कॉ – ऑपरेटीव्ह क्रेडीट सोसायटी हेडलॅन्ड सडा मुरगांव आपलो २४ वो वर्धापन दीस १७ डिसेंबराक सड्यावेल्या श्रीकलावती देवळा लागसारच्या मुख्यालयांत मनयतली. ह्या निमतान सांजेवेळार ४.३० वरांचेर श्रीसत्यनारायण पुजा आयोजीत केल्या.
-कोडारच्या सोमनाथ महालक्ष्मी देवस्थानाचो वर्धापन दीस आनी १६ ते १८ डिसेंबर ह्या काळांत जातलो. ह्या निमतान धर्मीक आनी सांस्कृतीक कार्यावळींचें आयोजन केलां, अशें देवस्थान समितीन कळयलां.
-ब्रह्मकरमळी- सत्तरीच्या श्री ब्रह्मदेव देवस्थानाचो ब्रह्मोत्सव मंगळार १७ ते बिरेस्तार १९ डिसेंबर मेरेन विवीध धर्मीक आनी सांस्कृतीक कार्यावळींनी मनयतले.
-आगरवाड्यावेल्या श्री नागनाथ पंचायतन देवळाची कळस स्थापना आयतार १५ डिसेंबराक सकाळीं १०.५२ वरांचेर जातली. ह्या निमतान शेनवारा सकाळीं ९.३० वरांचेर आगरवाडो शिमेवेल्यान रथांतल्यान वाजत नाचत कळसाचें देवळांत आगमन जातलें.
-श्री शांतादुर्गा (वरगांवकरीण) ग्रामदेवतेचो कालोत्सव बिरेस्तार १९ आनी शुक्रार २० डिसेंबराक विवीध कार्यावळींनी मनयतले. ह्या निमतान विवीध संस्कृतीक आनी धर्मीक कार्यावळींचें आयोजन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
