भांगरभूंय | प्रतिनिधी
मडगांव : साताराच्यान अठरा वर्सां पिरायेची चली पायल माने बेपत्ता आशिल्ल्याची कागाळ नोंद जाल्ली. हे विशींची म्हायती कोंकण रेल्वे पुलिसांकूय दिली. तेन्ना मत्स्यगंधा एकक्स्प्रेसींतल्यान केरळाक वतना तिका मुंबय स्टेशाचेर ताब्यांत घेतली. कागदोपत्री कारवाये उपरांत ते चलयेक तिच्या पालकांचे सुवादीन केली.
चली बेपत्ता आशिल्ल्याची कागाळ सातारा पुलीस स्टेशनांत नोंद जाल्ली. ती म्हायती महाराष्ट्रा सयत गोंय, कर्नाटकांतल्याय पुलीस स्टेशनांक दिल्ली. ते प्रमाण कोकण रेल्वे पुलिसांनीय तपास सुरू केल्लो. लोकमान्य टिकळ टर्मिनस ते मंगळुरु या मार्गार धांवपी मत्स्यगंधा एक्स्प्रेस हे गाडयेंत तास करतना ही चली सुभीष सुलोचना (रा. कोझिकोड, केरळ) हाचे वांगडा प्रवास करतना कोकण रेल्वे कर्मचार्यांक सांपडली. तिच्या सयत सुभीष हाका ताब्यांत घेवन कोकण रेल्वे पुलिसांनी सातारा पुलीस आनी पायलच्या कुटुंबीयां कडेन संपर्क केलो. कागदोपत्री कारवाय पुराय केले उपरांत कोंकण रेल्वे पुलिसांनी हे चलयेक पालकांचे सुवादीन केली. हो विशे प्रेम प्रकरणाचो आशिल्ल्याचें समजता. ह्या प्रकरणाचो फुडलो तपास सातारा पुलीस करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
