भांगरभूंय | प्रतिनिधी
40 दीस उपास करपाची पंचायत कर्मचाऱ्यांची शिटकावणी
पणजी, बातमीदार ः पंचायत कर्मचाऱ्यांक सातवो वेतन आयोग लागू करचो म्हणून आनी हेर मागण्या खातीर राज्यभरांतल्या पंचायत कर्मचाऱ्यांनी आयज सकाळीं सावन आझाद मैदानाचेर आंदोलन सुरू केला. मागण्यो पुराय जाल्यो ना जाल्यार आंदोलन चड खर करून 40 दीस उपास करपाचीय शिटकावणी कर्मचाऱ्यांनी दिल्या. हातूंत लिपिक, हवालदार आनी हेर कर्मचारी हांचो आस्पाव आसा. ह्या वेळार कामगार फुडारी राजू मंगेशकार, प्रसन्ना उटगी आनी हेर कर्मचारी हाजीर आशिल्ले.
सरकारान पंचायत कर्मचाऱ्यांक सवो वेतन आयोग लागू करुन आतां 15 वर्सां जालीं. सातवो वेतन आयोग 2016 वर्सा आयल्लो. राज्यांतल्या हेर सरकारी कर्मचाऱ्यांक 2018 वर्सा तो लागू जालो. पूण, पंचायत कर्मचाऱ्यांक तो अजून लागू जावंक ना अशें मंगेशकार हांणी सांगलें.
2023 वर्सा मडगांवांत जाल्ले राष्ट्रीय परिशदेंत सरकारान सातवो वेतन आयोग बेगोबेग लागू करपाची घोशणा केल्ली. पूण एक वर्स जाले तरी लेगीत हें आस्वासन पुराय जावंक ना. हाचे भायर 2018 वर्सा अर्थ खात्यान एक अधिसुचोवणी जारी केल्ली. ते प्रमाण सवो वेतन आयोग मेळिल्ल्या कर्मचाऱ्यांक सातवो वेतन आयोग दितले अशें सांगिल्लें. पूण हाचेरूय कसलीच कारवाय जायना अशें मंगेशकार हांणी सांगलें.
पंचायत कर्मचाऱ्यांक वेगवेगळीं कामां करचीं पडटात. सोमार ते बिरेस्तार मजगतीं तांकां सुटी दिनात. हाचे भायर तांकां पंच, सरपंच, सचीव, बीडीओ हांचेय उलोवप आयकून घेवचे पडटा. आमी आमच्या न्यायाच्या मागण्या खातीर आंदोलन करता. पंचायत कर्मचाऱ्यांनी काम सोडून 40 दीस उपास करचो कांय ना हाची जाप सरकारान दिवची, अशी मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
