भांगरभूंय | प्रतिनिधी
45 दुयेंतींक जाय किडणी, 950 जाणां कडल्यान अवयवदानाचो सोपूत
पणजी : फाटल्या साडेपांच वर्सांत राज्यांत किडणी प्रत्यारोपणाच्याे 29 शस्त्रक्रिया जाल्यात. 45 दुयेंतींक किडणीची गरज आसा. राज्यभरांतल्या 950 जाणांनी अवयवदानाचो सोपूत घेतला, अशी म्हायती भलायकी मंत्री विश्वजीत राणे हांणी विधानसभेंतल्या लेखी प्रस्नाचे जापेंत दिल्या.
आमदार कार्लुस फेरेरा हांणी हे विशींचो प्रस्न विचारिल्लो. गोंय वैजकी म्हाविद्यालय (गोमॅकॉ), हेल्थवे आनी मणिपाल ह्या तीन हॉस्पिटलांनी किडणी प्रत्यारोपणाच्यो शस्त्रक्रिया करतात. 2018 त गोमॅकाँत चार, 2019 त एक, जाल्यार हेल्थवे हॉस्पिटलांत पांच, 2020 त गोमॅकाँत चार आनी हेल्थवे हॉस्पिटलांत दोन, 2021 त गोमॅकॉ आनी मणिपाल हॉस्पिटलांत दरेकी दोन, जाल्यार हेल्थवे हॉस्पिटलांत चार, 2022 त हेल्थवे हॉस्पिटलांत तीन आनी अंदूं 2023 त 2 किडणी प्रत्यारोपण शस्त्रक्रिया केल्यात. हातूंत 23 जित्या मनशाच्यो जाल्यार 6 मरण आयिल्ल्या दुयेंतीच्या किडण्यांचे प्रत्यारोपण केला, अशें मंत्री राणे हांणी जापेंत नमूद केलां.
सध्याचे स्थितींत राज्यांत वट्ट 45 दुयेंतींक किडणीची गरज अासा. तातूंत सगल्यांत चड 10 दुयेंती साश्टींतले आसात. बार्देस आनी तिसवाडींतले दरेकी 9, दिवचलें पांच, फोंडें, मुरगांव आनी काणकोणांतल्या दरेकी तीन, सत्तरी आनी केपेंतल्या दरेकी एका दुयेंतीचो आस्पाव आसा. एक व्यक्ती मूळची कर्नाटकांतले आसून, ती व्यक्ती ‘सोटो-गोवा’ खाला किडणी प्रत्यार्पणाची वाट पळयता, अशें भलायकी मंत्र्यांनी स्पश्ट केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
