साखळे 5 फेब्रुवारीक धोंडू नायक संगीत संमेलन

भांगरभूंय | प्रतिनिधी

भांगरभूंय । प्रतिनिधी
साखळीः हरवळेंच्या राधाकृष्ण संगीत अकादमी वतीन साखळेच्या सर्गेस्त धोडू भिकू नायक हाचे यादी खातीर आयोजीत करतात तें पांचवे संगीत संमेलन 5 फेब्रुवारीक सकाळीं 9.30 तें रातयां 9.30 मजगतीं साखळेच्या शिवस्मृती खेडेकार सभाघरांत जातलें. ह्या वेळार भोवमान कार्यावळ लेगीत जातली.
सकाळीं 9.30 वरांचेर संमेलनाचें उक्तावण जातले, नव्या कलाकारांक माची मेळची हे खातीर दर वर्सा हें संमेलन आयोजीत करतात. उक्तावण कार्यावळीक आमोणेचो सरपंच कृष्णा गांवस, अजय प्रभूगांवकार, संजय नायक, साखळेचो नगरसेवक दयानंत बार्येकार हाजीर रावतले. संमेलनाच्या आयोजना खातीर शाम फातर्पेकार, गुरुदास गांवकार, चांगदेव नायक, आति, कारापूरकार, सागर गांवस, गजानन वांतेकार हांची समिती वेचून काडल्या.
संमेलनाच्या पयल्या सत्रांत . रघुवीर फडते हाचे सतार वादन, निमिषा कुरुप्पत्त, चंद्रकांत नायक हाचें गायन जातलें. दुसऱ्या सत्रात दनपारां  3 वरांचेर .नितेश सावंत हाचे  गायन. बुद्धेश तळकराचे एकोडी  तबलें वादन उपरांत रुपेश गांवस हाचें  गायन जातलें. सांजे 5 वरांचेर भोवमान कार्यावळ जातली. त्या वेळार अरुण गांवकार, विजय  धामस्कार, अर्जुन जल्मी,  भजनी कलाकार गणपत गांवकार हाचो भोवमान करतले.
हे कार्यावळीक मुखेल सोयरे म्हणून  मुख्यमंत्री डॉ. प्रमोद सावंत, मयेचो आमदार  प्रेमेंद्र विष्णू शेट, चित्रकार शिवानंद खेडेकार, गायक चंद्रकांत नायक, रामचंद्र नाईक,संस्थेचो अध्यक्ष .संतोष मळीक, दत्ताराम माडकर, अनिल जल्मी, समीर आत्मा प्रभू हाजीर रावतले. हे कार्यावळी उपरांत दत्तराज सुर्लकार हाचे एकोडी हार्मोनियम वादन आनी .डॉ.राम देशपांडे हांचे गायन जातले. संमेलनांत सुभाष फातर्पेकार, दत्तराज सुर्लकार, दत्तराज म्हाळशी, मालू गांवकर, कार्तिक च्यारी,  मयांक बेडेकर, दयानंद कांदोळकार,राज मडगावकार, मिलिंद परब, राजेश रेडकार, शैलेश गांवकार  साथसंगत करतले. संमेलन संगीत मोगीं खातीर उक्तें आसतलें. आयोजक समितीचे मुखेली रामचंद्र धोंडू नायक हांणी संमेलन  जैतिवंत करचें अशें लोकां लागीं मागलां.