भांगरभूंय | प्रतिनिधी
रानां कर्मचाऱ्यांचें तस्करांक सहकार्य, लोकांचो आरोप
फोंडें, प्रतिनिधी: साकोड्डेंच्यान खैर तशेंच सायल्याच्या लाकडाची तस्करी जाल्ल्यान ह्या वाठारांत सध्या बोवाळ जाला. रानां खात्याच्या वरिश्ठ अधिकार्यांनी साकोड्डा रानां कार्यालयांतल्या एका कर्मचार्याची बदली केल्या. देखून तस्करी करप्यांचें आयतेंच फावलां. खैरीची बेकायदेशीर येरादारी करपी टोळये वांगडा सागवान लाकूड तस्करी करप्या आड खर कारवाय करपाची मागणी थळावे करपाक लागल्यात.
साकोड्डें वाठारांतल्यान व्हडा प्रमाणांत खैरीच्या लाकडाची बेकायदेशीरपणान येरादारी करपा वांगडा सागवानची व्हडा प्रमाणांत तस्करी जाता अशी म्हायती थळाव्यां कडल्यान मेळ्ळ्या. खैरीचें प्रकरण उक्ताडार आयले उपरांत फाटल्या शुक्रारा वरीश्ठ रानां अधिकार्यांनी साकोड्डेंच्या एका कर्मचार्याचे बदली जरी केली तरी लाकूड तस्करी करपी एके टोळयेक रानां खात्याचे कांय कर्मचारी सहकार्य करता, असो आरोप लोकांनी केला. तांचेरूय कारवाय करपाची मागणी तांणी केल्या.
साकोड्डें भागांत पयलीं खैरीचें रान म्हणून वळखुपी वाठारांत सध्या खैरीचीं झाडां हाताच्या बोटार मेजपा इतलीं उरल्यांत. तस्करी करपी टोळीन सगळीं खैरीचीं झाडां फाटल्या 4-5 वर्सांनी मारून तांची येरादारी केल्ल्याची म्हायती थळाव्यांनी दिली. ताका लागून साकोड्डें हांगचें खैरीचें रान सध्या इतिहासांत जमा जालां. खैरीचें प्रकरण उक्ताडार आयिल्ल्याक साकोड्डें भागांत झाडां मारून उडोवप बंद जालां अशेंय दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
