भांगरभूंय | प्रतिनिधी
रस्त्यांचें डांबरीकरण, मंडपाचें काम निमण्या पांवड्यार
पणजी : पोरणें गोंयां जावपी सां फ्रान्सीस झेवीयर पवित्र कूड (रेलिक्स) दर्शन सुवाळ्याच्या उक्तावणाक पोप फ्रान्सीस हजर रावचे ना. तांकां केंद्रान निमंत्रण धाडूंक ना, अशें पवित्र कूड दर्शन सुवाळो समितीचे वांगडी फादर हेन्री फाल्कांव हांणी सांगलां. तांकां दोन वर्सां पयलीं आमंत्रण धाडपाची गरज आशिल्ली, अशें तांणी सांगलें.
सां फ्रान्सीस झेवीयर पवित्र कूड दर्शन सुवाळो २१ नोव्हेंबर २०२४ ते ५ जानेवारी २०२५ मेरेन चलतलो. सुवाळ्याची तयारी नेटान चालू आसा. उक्तावण सुवाळ्याक पोप फ्रान्सीस वा प्रधानमंत्री नरेंद्र मोदी हे कोणूच हाजीर रावचे नात. दिल्लीचे आर्चबिशप आनी गोंयचे सुपूत अनिल कुटो हे हाजीर रावतले. मुख्यमंत्री डॉ. प्रमोद सावंत आनी हेर मंत्री, आमदार येतले. हेर मानेस्तांची वळेरी आजून निश्चीत जावपाची आसा, अशें फादर फाल्कांव हांणी सांगलें.
चर्च वाठारांतले रस्ते हॉटमिक्स करपा सयत मंडप उबारपाचीं कामां चालू आसात. कामाचो नियाळ घेवपाक दर दिसा समितीचे वांगडी तशेंच पदाधिकार्यांच्यो बसका जातात. २१ नोव्हेंबराक सकाळीं ९.३० वरांचेर पयली प्रार्थना सभा (मास) सुरू जातली. ह्याच वेळार सुवाळ्याचें उक्तावण जातलें. २२ नोव्हेंबर ते ४ जानेवारी मेरेन सकाळीं ७ ते सांजेच्या ६ वरां मेरेन सेंट फ्रान्सीस झेवीयराची पवित्र कुड (रेलीक्स) भविकांक पळोवपाची वेवस्था आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
