भांगरभूंय | प्रतिनिधी
दर दिसा १० हजार लोक घेतले कुडीचें दर्शन
पणजी : पोरणें गोंयां जावपी सां फ्रान्सीस झेवीयर हांच्या पवित्र कूड दर्शन सुवाळ्याक कायदो, सुवेवस्था राखपा खातीर १५०० पुलिसांची वेवस्था आसतली. सोमारा आयोजन समिती आनी पुलीस म्हासंचालक हांचे बसकेंत कायदो सुवेवस्थेचो नियाळ जालो. मुख्यमंत्री डॉ. प्रमोद सावंत हे १८ नोव्हेंबराक चर्च वाठारांक भेट दिवन तयारेचो नियाळ घेतले, अशी म्हायती आयोजन समितीचे वांगडी फादर हेन्री फाल्कांव हांणी दिली.
पुलीस म्हासंचालक अलोक कुमार हांणी सोमारा पोरणें गोंय चर्च वाठाराक भेट दिली. सुरक्षा स्थितीचो तांणी नियाळ घेतलो. उक्तावणा वेळार कायदो सुवेवस्था राखपा खातीर मंडपांत १ हजार पुलिसांची वेवस्था आसतली. हे भायर पार्किंग तशेंच येरादारी वेवस्थापना खातीर पुलीस आसतले. सगळे मेळून देड हजार पुलीस वेवस्थे खातीर आसतले. सुरक्षा उपाय तशेंच पुलिसांचो त्रास भाविकांक जावचो ना, हाची जतनाय घेवपाच्यो सुचोवण्यो चर्चीन केल्या. दर दिसा १० हजार भावीक पवित्र कुडीचें दर्शन घेतले.
कूड दर्शन सुवाळ्याच्या उक्तावणाक आतां फकत १० दीस उरल्या. दर दिसा चर्च तशेंच आयोजन समितीच्यो बसका जायत आसा. फाल्यां मंगळारा आयोजन समितीचे समन्वय अधिकारी संदीप जॅकीस हे भेट दिवन तयारेचो नियाळ घेतले. उपरांत डॉ. सावंत हे पळोवणी करतले, अशी म्हायती फादर फाल्कांव हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
