भांगरभूंय | प्रतिनिधी
आमदार सिल्वा हांचें सरकाराक निवेदन
मडगांव, प्रतिनिधी : सां जुझे दे आरीयालांत १८ आनी १९ फेब्रुवारीक घडिल्ल्या घडणुकांची खोलायेन चवकशी जावची. तशेंच ग्रामस्थां वयले गुन्यांव सरकारान फाटीं घेवचे, हे खातीर मुख्यमंत्र्यांची भेट घेवन आमदार क्रुझ सिल्वा हांणी निवेदन सादर केलें. हाचे फुडेंय गांवांत कायदो आनी सुवेवस्थेची परिस्थिती निर्माण जावपाक शकता, हें मुख्यमंत्र्याक सांगलां.
ह्या वेळार मुख्यमंत्र्यान सहकार्य करपाचें आस्वासन दिल्ल्याचें सिल्वा हांणी सांगलें.
वेळ्ळीचे आमदार क्रुझ सिल्वा हांणी शुक्रारा सकाळीं मुख्यमंत्री डॉ. प्रमोद सावंत हांची भेट घेतली. बेनाभाट सां जुझे दी अरीयाल वाठारांत छत्रपती शिवरायांचो पुतळो बसोवपाचेर वाद निर्माण जाल्लो. ग्रामस्थां कडल्यान बेकायदेशीरपणान रस्त्याचें काम, मातयेची रास मारिल्ल्याचो दावो करून परवानगे बगर पुतळो उबारला अशें थळाव्यांचें म्हणणें आशिल्लें.
शिवजयंती दिसा ग्रामस्थांनी मंत्री सुभाष फळदेसाय हांचेर गुंडे आनी माती शेवटीली. हातूंत पुलीसूय जखमी जाल्ल्यान मायना कुडतरी पुलिसांनी २० जाणां सयत हेरांचेर गुन्यांव नोंद केल्यात. बिरेस्तारा सांजेवेळार सां जुझे दी अरीयालांतल्या ग्रामस्थांनी मेणवातीची फेरी काडून गांवांत शांतिकाय राखपाचो उलो मारिल्लो. आमदार क्रुझ सिल्वा हांणी ह्यान पयलीं जिल्होधिकारी अश्वीन चंद्रू ए. हांकां निवेदन दिवन पुतळ्याच्या संरक्षणा विशीं निर्णय घेवपा वांगडा घडणुकेचे चवकशेची आनी प्रत्यक्षांत पळोवणी करपाची मागणी केल्ली. शुक्रारा सकाळीं आमदार सिल्वा हांणी मुख्यमंत्र्यांची भेट घेतली.
गांवां सयत राज्यांत शांतिकाय आसची हीच आमची आदीं सावनूच मागणी. सां जुझे दे आरीयाल ग्रामस्थां वयले गुन्यांव सरकारान फाटीं घेवचे. तशेंच ह्या घडणुकांचो योग्य तपास करचो अशी मागणी मुख्यमंत्र्यां कडेन केल्या. मुख्यमंत्र्यांनीय गुन्यांव फाटीं घेवपा विशीं गरजेची मजत करपाचें आस्वासन दिल्ल्याचें सिल्वा हांणी म्हणलें.
पंचायतीन २५ तारखेक विशेश ग्रामसभा घेवपा खातीर बीडिओंकडेन परवानगी मागल्या. मात, ताका परवानगी मेळ्ळ्या काय ना, तें अजून खबर ना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
