भांगरभूंय | प्रतिनिधी
मडगांव, प्रतिनिधी ः साश्टीच्या सां जुझे दी अरियालांतल्या बेनाभाट वाठारांत छत्रपती शिवाजी महाराजांचो पुतळो स्थापन केल्ल्यान तणावाचें वातावरण निर्माण जालां. विरोधकांन मंत्र्यांचेर माती उडोवपाचो यत्न केलो देखून पुलिसांक लाठीचार्ज करचो पडलो. पुलिसांनी घडणूक सुवातेर बंदोबस्त दवरला. आयतारा सकाळीं थळाव्या लोकांनी खाजगी जमीन भरून रस्तो करपाक हरकत घेतिल्ली. पुलीस आनी उपजिल्होधिकारी हांच्या हस्तक्षेपा उपरांत ह्या वादाचेर पडदो घालपाचो यत्न जालो. ते उपरांत शिवभक्तांनी त्या मार्गांतल्यान आयतारा सांजवेळा छत्रपती शिवाजी महाराजांचो पुतळो व्हरून स्थापन केलो. कसलीच अयोग्य घडणूक घडची न्हय म्हूण जिल्लो प्रशासन अधिकारी आनी पुलिस बंदोबस्त दवरलो. सोमारा सकाळीं परतून बेनाभाट सां जुझे दी अरियाल वाठारांत हांगा शिवरायाची मूर्त नाका अशें म्हणत गांवचे लोक ते सुवातेर जमले. सकाळीं मंत्री सुभाष फळदेसाय घडणुकेच्या जाग्यार भेट दितना थळाव्या लेकांनी तांचे कडेन संवाद सादपाचें निमित्त करून माती उडोवपाचो यत्न केलो, पूण हाजीर आशिल्ल्या शिवभक्तांक लागून त्या यत्नाक अपेस आयले. ते उपरांत पुलिसांनी लाठीचार्ज करून हो जमाव पयस केलो. तरी लेगीत थळाव्या लोकांनी दनपार मेरेन रस्तो आडावन शिवारायांची मूर्त नाका आनी रॅली काडपाक दिवचे नात अशी मागणी केली. ते खातीर पुलिस बंदोबस्त दवरला आनी दक्षिण गोंयांतले वेगवेगळे शिवभक्त थंय हाजीर आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
