भांगरभूंय | प्रतिनिधी
सांवयवेरें, प्रतिनिधी: कुंडयच्यान केरी मार्गान सांवयवेर्यां येतना कॉंक्रिटान भरिल्लो जी.ए.०६ टी ६५३१ ह्या नंबराचो आर्. एम. सी. ट्रक उमथलो. सांवयवेर्यां मुखारच्यान येवपी वाहनाक वाट दिवपाचो यत्न करतना नव्या हॉटमिक्सींक केल्ल्या रस्त्याच्या कुशीक ट्रकाचो टायर रोमलो आनी ट्रक उमथलो. ट्रकाचो ड्राइव्हर आनी क्लिनर हे दोगूय वाटावले.
हो ट्रक कॉंक्रिट घेवन सांवयवेर्यां रस्त्या कुशीक राखणे वणट बांदपाच्या कामा खातीर येतालो. रामदास मायणीकार ते सकयल्या मुखेल व्हाळाक मेळपी ल्हानसो व्हाळ आसा. ह्या व्हाळाक राखणे वणट बांदपाची मागणी आदीं सावन जाताली. मात अर्दीच कॉंक्रीटची राखणे वणट बांदिल्ली आनी ताचे फुडली चिर्यांची बांदून काडिल्ली. हो ट्रक देंवतेर देंवतना जंय कॉंक्रीटाची वणट सोंपिल्ली थंय पावतांक मुखारच्यान येवपी वाहनाक वाट दिवपाचो यत्न करतना हालींच हॉटमिक्सींग केल्ल्या रस्त्यांत रोमपाक लागलो. तेन्ना ट्रक उमथो पडिल्ल्याचें कळटांच ट्रक चालकान आनी क्लिनरान वेळ वळखून ट्रका भायर उडी घेतली. उपरांत रोखडोच ट्रक उमथलो.
मे म्हयन्यांतूच आपेव्हाळ ते सावयवेरें ह्या रस्त्याचें रुंदीकरण करून डांबरीकरण केल्लें. जंय ट्रक उमथलो थंय हॉटमिक्स डांबरीकरणाचो रस्तो खचलो. ताका लागून पावसांत ताकतिकेन केल्ल्या ह्या रस्त्याच्या दर्जा विशीं थळाव्यांक प्रस्न पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
