सांतिनेजांतल्यो बांयों परत जिवीत करच्यो

भांगरभूंय | प्रतिनिधी

नगरसेवक वसंत आगशीकार हांचें महापौरांक पत्र

भांगरभूंय। प्रतिनिधी
पणजीः सांतिनेज वाठारांतलो उदकाचो उणाव भरून काडपाक बांयच्या उदकाचो वापर करुं येता. पूण सध्या ह्यो बांयों सिवेरेजीच्या उदकाक लागून प्रदुशीत जाल्यात. देखून त्यो परत जिव्यो करपाची गरज आसा, अशी मागणी आदले उपमहापौर वसंत आगशीकार हांणी केल्या.
आपल्या प्रभागांत आशिल्ल्यो बांयों दुरूस्त करपाची मागणी करपी पत्र आगशीकार हांणी म्हापौर रोहित मोन्सेरात हांकां बरयलां.
पत्रांत बरयतना आगशीकार हांणी तांच्या प्रभागांत 15 बांयों आशिल्ल्यांचें नदरेक हाडलें. आमकां खबर आसा बांदकाम खात्याच्या उदकाचे स्रोत खूब उणे आसात. पणजे खुबश्या सोसायटींची गरज लक्षात घेवन पणजेंत ज्यो बांयों आसात त्यो दुरूस्त करून परत जिव्यो करच्यो अशी म्हजी मागणी आसा, अशें आगशीकार म्हणटात.
पणजे खुब बांयों आसात. ही आमची संपत्ती. पूण सिवेज लायनीक वेरो पडून घाणयाऱ्या उदकाची गळटी जाल्ले कारणान त्या बांयांतलें उदक प्रदुशीत जालां. पणजी म्हापालिका ही संपत्ती वांटोवपा खातीर हो प्रकल्प प्राधान्यान हातांत घेतली आनी सैम तशेंच फुडले पिळगे खातीर योगदान दितली अशी म्हाका आस्त आसा, अशें आगशीकार हांणी पत्रांत म्हणलां.