भांगरभूंय | प्रतिनिधी
१४ दीस जावन गेले तरी बाशुदेव मेळना : पुलिसांनी तपासांत केले बदल
पणजी : सांतइस्तेव जुव्यांचेर १४ दिसां पयलीं आखाडो फेरी धक्याचेर घडिल्ले घडणुकेन पोरणें गोंयच्या पुलिसांक नाकापुरो केलें. हे घडणुकेन वाटावल्ले चलयेन त्या घडिल्लें सगळें सांगलें. ते फाटभूंयेर पुलिसांनी तपास करून हुबळीच्यान दोगांक अटक केली. मजगतीं पुलिसांक बाशुदेव भंडारीचो आजूनय पत्तो लागूंक ना. ताका लागून पुलिसांनी आपलो तपास वेगळे वटेन वळयला.
बाशुदेव हाका अपघातांत मरणू येवंकूच ना. हे नदरेन पुलिसांनी सध्या तपासाक सुरवात केल्या. मजगतीं पुलिसांनी दिल्ले म्हायती प्रमाण, भंडारी कुटुंब हें मुळचें नेपाळचें आनी तें गुजरातांत वेवसाया खातीर स्थानीक जाल्लें. पुलिसांनी भारत- नेपाळ शिमेवेले विमानतळ, रेल्वे स्टेशनां, आंतर राज्य बस स्टॅण्ड आनी हेर सुवातांचेर शिटूक रावपाची शिटकावणी दिल्या.
दरम्यान, बाशुदेवच्या मोबायलार ४ सप्टेंबराक कॉल केलो तेन्ना ४ सेकंद तशेंच ३५ सेकंदा खातीर कोणें तरी फोन उखलिल्लो, अशी म्हायती बाशुदेव हांच्या बापयन दिल्ली. पुलिसांनी हे नदरेन तपास केलो तेन्ना परत हे विशीं कांयच सांपडूंक ना. ताचो सोद घेवपा खातीर दर्यादेग पुलीस, उजो पालोवपी दळ आनी नौदळानूय मेहनत घेतिल्ली.
मजगतीं, ही घडणूक घडले उपरांत बाशुदेवची इश्टीण चलत लागसारच्या घरांत मजत घेवपा खातीर वतना सीसीटीव्ही फुटेजींत मुखार आयलें. मजगतीं, बाशुदेवच्या भावान त्या घरांतल्या लोकां कडल्यान म्हायती घेवपाचो येत्न केलो तेन्ना तांणी दिल्ले म्हायती प्रमाण, एक चली रातची आयिल्ली आनी तिणें तिचो अपघात जाल्ल्याचें सांगलें.
मजगतीं, घरांतल्या एका वांगड्याच्या मोबायलावेल्यान तिणें आपल्या इश्टाचो नंबर मेळयलो आनी ताचे कडेन ती बरोच वेळ उलयली. इतलें सगळें जावनूय बाशुदेवाक वाटावपा खातीर ह्या घरांतल्या लोकांची मजत कित्याक घेवंक ना? असो प्रस्न बाशुदेवच्या भावान केलो. मजगतीं, हे विशीं आनी हेर जायत्या गजालींचो दुबाव आयिल्ल्यान बाशुदेवचे इश्टीणीक फुडले चार दीस पुलीस स्टेशनांत चवकशे खातीर हाजीर रावपाचे आदेश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
