भांगरभूंय | प्रतिनिधी
म्हापशें, प्रतिनिधी ः उच्च न्यायालयाच्या निर्देशा प्रमाण उत्तर गोंयच्या कोमुनिदादीच्या प्रशासकांनी शुक्रारा (ता. 12) सांगोल्डा कोमुनिदाद मालमत्ते 22 बेकायदेशीर बांदकामां मोडपाचें काम हातांत घेतलें. हाचो अहवाल 25 एप्रील मेरेन सादर करचो पडटलो. मजगतीं, दनपारां मेरेन चार बांदकामां मोडिल्लीं.
सांगोल्डाच्या कोमुनिदाद वाठारांत 22 अनधिकृत बांदकामां उबारिल्लीं. थळावे कोमुनिदादीन हीं घरां बेकायदेशीर आशिल्ल्याचें म्हणिल्लें. 2012 वर्सा सावन कोमुनिदाद आनी घर धनया मदीं कायदेशीर लडाय चलताली. सर्वेक्षण क्र. 81/1 तलीं हीं 22 बांदकामां मोडून उडोवपाचे निर्देश उच्च न्यायालयान दिल्ले. हे विशीं घर धनयांनी सर्वोच्च न्यायालयांत याचिका केल्ली, पूण सर्वोच्च न्यायालयान मुंबय उच्च न्यायालयाच्या गोंय खंडपिठाचो निर्णय मान्य केलो. उच्च न्यायालयाच्या आदेशा उपरांत उपजिल्होधिकाऱ्यांनी हीं बांदकामां उडोवपाचो आदेश दिलो. उपजिल्होधिकारी हे उत्तर गोंय डिमोलिशन पंगडाचोय प्रभारी आसात. तशेंच, उपजिल्होधिकाऱ्यान आयज शुक्रारा उल्लेख केल्लीं अनधिकृत बांदकामां मोडून उडोवपा खातीर उत्तर विभाग कोमुनिदाद प्रशासकांक ‘डिमोलिशन पंगड’ उपलब्ध करून दिलो. ते प्रमाण सकाळीं 9.30 वरांचेर तो पंगड आनी व्हड पुलीस दळ थळार पावलो.
ह्या वेळार पंगड आनी उत्तर गोंय कोमुनिदाद प्रशासनान ह्या घर धनयांक घरांतल्यान सामान भायर काडपाक वेळ दिलो. सुरवेक कांय जाणांनी ताका विरोध करपाचो यत्न केलो. तेच प्रमाण बायलांनी व्हड प्रमाणांत निशेध केलो. पूण विरोध जालो तरी लेगीत हे मोडपाचें काम सुरू जालें. ह्या वेळार घरांत रावपी लोकांनी आपलें सामान भायर काडलें, हें करतना जायते जाणांक दुख्ख जाले. थोडे व्हडल्यान रडटाले, तर तातूंतल्या कांय जाणांनी प्रशासनाक तशेंच सरकाराक गाळीय संवल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
