भांगरभूंय | प्रतिनिधी
१६.१० लाख रुपयांचो घोटाळो, पंचायतीचो वांगडी म्हणूनय अपात्र
म्हापशें, प्रतिनिधी: सांगोल्डाचो उपसरपंच उल्हास मोरजकार हांणी १६.१० लाख रुपयांचो घोटाळो केल्ल्याचें कळ्ळे उपरांत पंचायत संचालनालयान तांकां उपसरपंच पदा वयल्यान काडून उडोवपाचो आदेश दिला. पंचायतीचो वांगडी म्हणूनय ताका अपात्र थारायला. हाका लागून सांगोल्डा पंचायतीच्या ७ व्या वॉर्डांत पोटवेंचणूक घेवची पडटली. ह्या आदेशा प्रमाण तांकां १९ मे २०२६ मेरेन वेंचणूक लढोवंक मेळची ना.
सांगोल्डाच्या आनंद तुळसकार हांणी १८ ऑगस्ट २०२३ दिसा उल्हास मोरजकार हांचे आड पंचायत संचालनालयांत कागाळ दाखल केल्ली. गोंय पंचायत राज कायदो १९९४ च्या कलम २१० आनी २१०-अ खाला कागाळ दाखल केल्ली. कागाळदाराचे वतीन ऍड. व्ही. नायक जाल्यार ऍड. झेड. झेलर हांणी युक्तीवाद केल्लो. दोनूय युक्तीवाद आयकून पंचायत संचालक सिद्धी हळर्णकार हांणी वयलो आदेश पास केलो.
मे २०२१ ते जून २०२२ ह्या काळांत पंचायत वांगडी उल्हास मोरजकार हाणें केल्ल्या अर्थीक वेव्हाराचीं सगळीं कागदपत्रां सादर करपाचे निर्देश सांगोल्डा पंचायत सचीवाक दिल्ले. सचीवान कागदपत्रां सादर केल्या उपरांत पंचायतीचें ८ लाख ७० हजार ९३५ रुपया लुकसाण जाल्ल्याचें दिसून आयलें. इतलेंच न्हय तर खात्याच्या मुखेल अधिकार्यांनी केल्ले चवकशेंत मोरजकार हाणें वट्ट १६.१० लाखांचे घोटाळे केल्यात हें स्पश्ट जाता. देखून कलम २१० खाला ही रक्कम तांचे कडल्यान व्याजा वांगडा वसूल करची अशें ह्या आदेशांत स्पश्ट केलां.
सांगोल्डाच्या आदल्या पंचायत मंडळाचो कार्यकाळ १८ जून २०२२ दिसा सोंपलो. उपरांत २०२२ ते २०२७ ह्या काळांत नवें पंचायत मंडळ सत्तेर आयलें. हातूंत मोरजकार हे उपसरपंच जाले. ही कागाळ २०१७ ते २०२२ ह्या काळांत जाल्ल्या अर्थीक घोटाळ्या कडेन संबंदीत आसा. त्या काळांत मोरजकार ७ एप्रील २०२१ ते १८ जून २०२२ मेरेन सरपंच आशिल्ले. मे २०२१ ते जून २०२२ मेरेन ताणें पंचायतीच्या निधीची मनमानी पद्दतीन वापर केलो. चेका वरवीं स्वताच ८ लाख ७० हजार ९३५ रुपया काडले. अशें करप म्हळ्यार पंचायत राज कायदो मोडप, असो उल्लेख तुळसकार हांणी कागाळींत केल्लो.
मोरजकार सरपंच जाले उपरांत १६ एप्रील २०२१ दिसा पंचायतीन थाराव संमत केलो. पंचायतीचें बँक खातें मोरजकाराच्या नांवान हस्तांतरीत करपाचें थारायलें. ते उपरांत पंचायत मंडळाच्या नेमा प्रमाण त्या खात्यांतल्यान पयशे काडप सक्तीचें आसता. पूण ते उपरांत मोरजकार हांणी ३४ फावटीं बँकेंतल्यान पयशे काडले असोय उल्लेख कागाळींत आयला. सुनावणी चालू आसतना पंचायत संचालकांनी सचीवा कडेन तांणी केल्ल्या वेव्हारा विशीं सगळी म्हायती मागिल्ली.
सचीवान सादर केल्ले म्हायती प्रमाण सोळा लाख १० हजार रुपयांचो घोटाळो जाल्ल्याचें दिसून आयलें. मजगतीं, हे आरोप निराधार आसात अशें प्रतिवादी मोरजाकार हांणी सांगलें. ही रक्कम फकत पंचायतीच्या कामां खातीर वापरिल्ली असोय दावो तांणी केला. पूण, तशे पुरावे ते सादर करूंक शकले ना. सुनावणी उपरांत पंचायत संचालकान तुळसकार हांची कागाळ खरी आसा अशें सांगून उल्हास मोरजाकार हांकां उपसरपंच पदा वयल्यान काडून पंचायत वांगडी म्हणून अपात्र थारायलो. हाका लागून सांगोल्डाच्या ७ व्या वॉर्डांत पोटवेंचणूक घेवची पडटली. मजगतीं, ह्या आदेशाक लागून मोरजकार हाका पोटवेंचणूक लढोवंक मेळची ना. १९ मे २०२६ मेरेन वेंचणूक लढोवपाक तो अपात्र आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
