भांगरभूंय | प्रतिनिधी
फोंडेंः सांगोड- मोलें वाठारांत भात लागवडी खातीर कानालाच्या उदकाची पुरवण उणी जाल्ल्यान शेतकारांनी हुस्को उक्तायला. राज्यांत शेती वेवसाय वाटावपाक उदका स्त्रोत खात्यान पयलेच फावटी बंद खणीच्या उदकाची पुरवण करपाचो यत्न सुरू केला. पूण फुडल्या कांय दिसांत शेतांनी बसयिल्ल्या पंपातल्यान उदकाची पुरवण जाली ना जाल्यार शेती वेवसायाचेर हावळ येवपाची शक्यताय आसा असो भंय शेतकारांक पडला.
फाटले कांय दीस जाले सांगोड वाठारांत शेती वेवसाया खातीर उण्या उदकाची पुरवण जाता. पसवल्ल्या शेतांक उदक सारकें मेळना म्हूण शेतकार चिंतेंत पडल्यात. शेती वेवसाय वाटावपाक उदका स्त्रोत खात्याचें सहाय्यक अभियंतो सदानंद नायक आनी कनिश्ठ अभियंतो सागर नायक हांणी शेता कडेन आशिल्ल्या बंद खणीच्या उदकाची सोय केल्या. ते बंद खणीर पंप बसोवपाचें काम पुराय जाला. बेगिनूच शेतां खातीर पंपाच्या उदकाची पुरवण जातली.
बिंबल-कुळें हांगाच्यान दुदसागर न्हंयचें उदक सांगोड मेरेन कानालांत्यान पुरवण करताले. पुर्तुगेझ काळा सावन ह्या शेती वेवसायाक कानालाच्या उदकाची पुरवण जाता. पूण पुर्तुगेझ काळांत बांदिल्ल्या कानालांची दुरुस्ती केल्ली ना. ताका लागून बिंबल तें सांगोड मेरेन कानालाक खूब कडेन गळटी लागल्या. फाटल्या वर्सा खात्या खाला ह्या कानालाची दुरुस्ती केल्ली. पूण दुरुस्ती सारकी जावंक नाशिल्ल्यान निमाण्या सुवातेर आशिल्ल्या सांगोड शेतांक उण्या प्रमाणांत उदकाची पुरवण जाता.
थळावे आमदार गणेश गांवकार, उदका स्त्रोत खात्याचे सहाय्यक अभियंतो सदानंद नायक, कनिश्ठ अभियंतो सागर नायक आनी थळावे पंच वांगडी विठोबा मळेकार हांणी शेती वेवसाया खातीर उदका पुरवण करपाचो खूब यत्न केलो. शेती वेवसायाक उदका पुरवण जावंक नाशिल्ल्यान, अंदूं खूबश्या शेतकारांनी शेतां पडींग दवरल्यात. पंपाच्या उदकाची सोय केल्यार फुडारांत पडींग शेतांनी परतून लागवण जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
