भांगरभूंय | प्रतिनिधी
भांगरभूंय । प्रतिनिधी
सांगेंः संगमपूर भौशीक गणेशोत्सव मंडळाच्या चवथ्या निमंत्रीत पंगडांच्या वंदे मातरम हे सांस्कृतीक कार्यावळींत सांगेच्या युनियन हायस्कूल पंगडान 10 हजार रुपयांचें पयलें इनाम आनी शशिकांत तारी यादस्तीक करंड मेळयलो. कुडचडेच्या न्यू एज्युकेशनल इन्स्टिट्यूट पंगडाक सात हजार रुपयाचें दुसरें इनाम आनी गुरुनाथ नायक पुरस्कृत करंड फावो जालो.
हे कार्यावळींत वट्ट सात हायस्कुलांनी वांटो घेतिल्लो. उलोवपाचे सर्तींत युनियन हायस्कुलाक पयलें आनी नेत्रावळी सरकारी हायस्कुलांक दुसरें इनाम मेळ्ळें. ताकां श्रीकांत दिवकर यादस्तीक करंड भेट म्हणून दिले. भक्ती गीत गायन सर्तींत न्यू एज्युकेशनल इन्स्टिट्यूटाक पयलें, सोमनाथ इंग्लिश हायस्कुलाक दुसरें इनाम फावो जालें. ताकां हरिश्चंद्र फडते यादस्तीक करंड मेळ्ळे.
लोक नाच सर्तींत युनियन हायस्कूल पंगड पयलो आनी एज्युकेशनल इन्स्टिट्यूट पंगडाक दुसरें इनाम म्हणून रघुवीर नायक यादस्तीक करंड मेळ्ळे. रिकॉर्ड नाच सर्तींत ह्याच हायस्कूल पंगडांक पयलें आनी दुसरें इनाम आनी चंद्रकांत तारी यादस्तीक करंड दिले. नेत्रावळी सरकारी हायस्कुलाक तिसऱ्या नंबराचें इनाम फावो जालें.
सर्तींत सुलकर्णे डॉनबॉस्को हायस्कूल, वालकिणी सरकारी हायस्कूल, चंद्रभागा तुकोबा नायक हायस्कूल पंगडान वांटो घेतिल्लो. प्रतिक्षा मराठे, तुषार करमळकार, कृपेश सप्रे, रामकृष्ण वेर्लेकार आनी साईश मालवणकार हांणी परिक्षक म्हणून काम पळयलें. कार्यावळीचे संयोजक गुरुनाथ नायक हांणी सूत्रसंचालन करून निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
