भांगरभूंय | प्रतिनिधी
सरकार सैम सांबाळपाच्यो मारता फटाश्योः मिल्टन फर्नांडीस
सांगेंः आयआयटीचो विशय दिसान दीस वाडटा तशें वातावरण तापता. लोकांक आयआयटी नाकाच. लोकांचो खर विरोध आसूनय थळावे आमदार तशेंच मुख्यमंत्री हांगा प्रकल्प हाडूंक सोदतात. हातूंत तांचो सुवार्थ आसा. तांणी कितलोय जरी यत्न केलो तरी आमचो सदांच विरोध आसतलो अशें आयज धरणें आंदोलना वेळार शेतकारांनी आवाज उठयलो.
काल (बुधवारा) धरणे आंदोलनाचो 28 वो दीस. जशे दीस वाडटात तशें लोकांचो वा साबार संस्थांचो तांकां तेंको मेळटा. आयज गोंय भावांचो एकवट, काणकोण गोंयकार, चांदोर एकवट ह्या संस्थांनी तांकां तेंको दिलो.
ह्या वेळार जाॅक फर्नांडीस हांणी म्हणलें, गोंयकारांक झगडले बगर कांयच मेळना हें सिध्द जालां. हो गांव, शेत, सैम लोकांनी फुडले पिळगे खातीर सांबाळून दवरला. हांगा शेताचोच प्रस्न ना. हांगा सैमाचो प्रस्न आसा. जनावरांचो प्रस्न आसा. सुशेगाद गांवांत लोकांक त्रास करपाक कित्याक फुडें सरल्यात? सरकारचो हातू भितर गौडबंगाल आसा अशे तांणी म्हणलें.
व्हिरियाटो फर्नांडीस हांणी म्हणलें, आयआयटी सारको प्रकल्प हाडून गांव काबार करपाचें धोरण सरकारचें आसा. सैम मोगी बोवाळ मारतात सैम सांबाळात, आनी हांगां सैमाचो उध्दवस्त करपाचो यत्न चल्ला. दोंगर सांबाळून दवरप म्हळ्यार भुरग्यांचो फुडार तिगून उरतलो. आयआयटी नाका हो शेतकारांचो प्रश्न सैम मोग्याचो प्रश्न. गोंयांत कितलेशेच जागे आसात थंय व्हरात आयआयटी. सरकारान लोकांचे आयकूंन घेवपाक जाय. जर आयकले ना जाल्यार लोक उठ्ठले आनी सगलें पेट्टलें अशे व्हिरियाटो फर्नांडीस हांणी सांगलें.
मेळावले जी स्थिती जाल्ली ती स्थिती हागा जावंक दिवची न्हय. शेतकार आपल्या शेता खातीर, सैमा खातीर झगडटात तांकां न्याय मेळूंकूच जाय. कारण लोक दोंगरा खातीर झगडटात, सैमा खातीर झगडटात अशें फ्रेडी ट्रावास हांणी म्हणलें.
आयज शेतकार सैमा खातीर दोंगरा खातीर झगडटात, सरकार सैम सांबाळपाच्यो फटाश्यो मारता, आनी हांगा सैमाचें लुकसाण करपाचो यत्न चल्ला. आयज सैम सांबाळपा खातीर सैम मोगी खंय गेले? अशें मिल्टन फर्नांडीस हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
