भांगरभूंय | प्रतिनिधी
दिवचल, प्रतिनिधी: विठ्ठलापूर-सांखळे समीर अली ह्या मूळ उत्तरप्रदेशच्या १२ वर्सां पिरायेच्या भुरग्याचो तकलेर फातर घालून खून जाल्लो. खून केल्या उपरांत दुबावीत चंदू पाटील (मूळ जळगांव) हो पळून गेल्लो. ताका आयज धाडशी कारवायेंत कल्याण पुलिसांचे मजतीन दिवचलच्या पुलिसांनी अटक केली. ताका दिवचलचे प्रथम श्रेणी न्यायालयांत हजर करून सात दिसांची पुलीस बंदखण घेतल्या.
आपले कुडींत सुस्त न्हिदिल्ल्या समीराक चंदून उखलून ५० मिटर अंतराचेर व्हेलो. उपरांत तकलेर फातर घालो आनी ताका थंयच सांडून थंयच्यान पळ काडलो. हे विशीं दिवचल पुलिसांनी तपासाक गती दिवन दोन पंगड तयार केल्ले. उपनिरीक्षक सुनील पाटील, लक्ष्मण नायक, प्रशांत गांवकार हो एक पंगड, जाल्यार दुसर्या पंगडान उपनिरीक्षक विराज धावस्कार, निलेश फोगेरी, मयूर आसोलकार हांचो आसपाव आशिल्लो. ह्या दोनूय पंगडांनी खर तपास करून चंदू अंबादास पाटील (३०) हाका कल्याण रेल्वे स्टेशनार ताब्यांत घेतलो आनी दिवचले हाडलो.
हे विशीं पुलीस अधीक्षक अक्षत कौशल, उपाधीक्षक सागर एकोस्कार तशेंच निरीक्षक दिनेश गडेकार हांच्या मार्गदर्शना खाला सुनील पाटील, विराज धावस्कार, विकेश हडफडकार आनी हेर तपास करतात.
उपलब्ध म्हायती प्रमाण, विठ्ठलापूरांतले एके डेरी फार्मांत चंदू पाटील (३१) हो कामगार काम करतालो. आरोपी चंदू सोरो पिल्ल्यान ताका कामा वेल्यान काडिल्लो. उपरांत दोन दिसांनी डेरी धनयान उत्तरप्रदेशांतल्यान एकल्याक चंदूचे सुवातेर कामाक दवरलो. चंदून हांगा येवन नव्या कामगारा कडेन वाद घालो. आपल्याक कामा वयल्यान काडून दुसर्याक कामाचेर दवरिल्ल्यान चंदून शेनवारा त्या कामगाराच्या १२ वर्सां पिरायेच्या भावाक न्हिदिल्ले अवस्थेंत गोठ्या कुशीक व्हरून ताचो खून केलो. उपरांत धनयाची दुचाकी घेवन पळ काडलो. ती दुचाकी थिवी रेल्वे स्टेशनाचेर सांपडली. तो महाराष्ट्रांत पळून गेल्ल्याचें पुलिसांक कळ्ळें.
पुलिसांनी घडणुके सुवातेर वचून सगळे पुरावे एकठांय केले. तशेंच फातर आनी हेर वस्तू ताब्यांत घेतल्यो. आरोपीक आयज सकाळीं कल्याण पुलिसांचे मदतीन दिवचल पुलिसांनी रेल्वे स्टेशनाचेर अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
