भांगरभूंय | प्रतिनिधी
सांखळे: विठ्ठलापूर- सांखळे समीर अली (उत्तरप्रदेश) ह्या १० वर्सां पिरायेच्या भुरग्याचे तकलेर फातर घालून ताचो खून जाला. दुबावीत आरोपी चंदू पाटील (जळगाव महाराष्ट्र) हो हे घडणुके उपरांत पळून गेला. धनयान कामा वयलयन काडिल्ल्याच्या रागांतल्यान नव्या कामगाराच्या भावाक दुबावितान मारिल्ल्याचो दुबाव पुलिसांनी उक्तायला.
दुबावितान सुस्त न्हिदेंत आशिल्ल्या समीर हाका उखलून कुडींतल्यान ५० मिटराच्या अंतराचेर व्हेलो. थंय समिराचे तकलेर दुबावितान गुणो घालो आनी ताका थंयच सांडून थंयच्यान पळ काडलो. पळ काडपाक दुबावितान आपल्याआदल्या धनयाचीच दुचाकी वापरली. ती पुलिसांक थिये रेल्वे स्टेशनाचेर मेळ्ळी.
मरण आयिल्ल्या भुरग्याचो भाव तीन दिसां पयलीं बाक्रे हांचे कडेन गोरवांच्या गोठ्यांत काम करपा खातीर आयिल्लो. वांगडा तांणी आपल्या भावाक हाडिल्लो. काम करून भावाक शिक्षण दिवपाचो ताचो हेत आशिल्लो. धनयान गोठ्या लागसारा एके कुडींत रावपाची तांची वेवस्था केल्ली. आयतार २२ वेर सकाळीं सुमार ५ वरांचेर मरण आयिल्ल्याचो भाव न्हिदेंतल्यान जागो जालो. तेन्ना आपले कुशीक भाव आशिल्ल्याचें ताका कळ्ळें. कुडी भायर वचून तांणी भावाक उलो मारलो. आशिकुशीक तांणी भावाक सोदलो. तेन्ना कुडी पसून कांय अंतराचेर ताचो भाव रक्तांत माखिल्लो ताका सांपडलो.
रोखडेंच तांणी आपल्या धनयाचे मजतीन भावाक सांखळे भलायकी केंद्रात दाखल केलो. मात दोतोरांनी ताका मरण आयिल्ल्याचें सांगलें. उपरांत दिवचल पुलिसांक हे विशीं म्हायती दिली.
दुबावीत आरोपी रेल्वेंतल्यान महाराष्ट्रांत पळून गेल्ल्याचें पुलिसांक कळ्ळें. पुलिसांचो एक पंगड ताका धरपा खातीर धाडला.
दुबावीत चंदू पाटील हो कागाळदार धनी बाक्रे हांचे कडेन कामाक आशिल्लो. ताका सोरो पिवपाचें वेसन लागलें आनी तो कामाक सारको येना जालो. ताका लागून बाक्रे हांणी ताका कामा वयल्यान काडलो. परत कामार घेवचो अशी ताणें धनया कडेन विनवणी केली. मात धनयान दुसर्याक कामाक दवरिल्लो. मरण आयिल्ल्याच्या भावाक लागून आपलें काम गेल्ल्याचो राग दुबावीत धरून आशिल्लो. ह्याच रागांतल्यान तांणी ताच्या ल्हान भावाचो जीव घेतलो, असो दुबाव पुलिसांक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
