भांगरभूंय | प्रतिनिधी
सांखळे : चैत्री उत्सवा खातीर नामना आशिल्ल्या हांगाच्या श्रीपांडुरंगाच्या आयज सकाळीं सुमार ८.३० वरांचेर भांगराच्या कळसाची प्रतिश्ठापना जाली. मंत्री विश्वजीत राणे हांचे हस्तुकीं हो भांगराचो कळस देवळाच्या तेंमकार विधी करून बसयलो. तांणीच हो भांगराचो कळस श्रींच्या चरणार अर्पण केला.
धर्मीक विधी, मंत्रोच्चार आनी भक्तांचे हाजेरींत हो सुवाळो जालो. पुराय कळसाच्या प्रतिश्ठापनेक लागून देवळाच्या वैभवांत आनीक भर पडल्या. ह्या वेळार देवूळ समितीचे पदाधिकारी तशेंच व्हडा संख्येन भावीक हाजीर आशिल्ले.
मजगतीं, राणे कुटुंबान खुबश्या देवळांक भांगराच्यो वस्तू अर्पण केल्यात.
बोडगेश्वराक भांगराची मशाल
म्हापशेंच्या बोडगेश्वर देवाक भलायकी मंत्री विश्वजीत राणे आनी तांच्या कुटुंबान आदले मुख्यमंत्री प्रतापसिंग राणे हांच्या ८३ व्या वाडदिसा निमतान २०२३ वर्सा भांगराची मशाल अर्पण केल्या.
कोल्हापूरच्या श्रीकरवीर निवासिनी अंबाबाई देवळाकूय भांगराचो कळस अर्पण केला. पोरण्या कळसाक लागून उदकाचे गळटीची समस्या निर्माण जाल्ली. हाका लागून देवळाचे प्राचीन रचणुकेक धोको निर्माण जाल्लो. ह्या पुराय प्रकल्पाचो खर्च राणे कुटुंबान केला.
शांतादुर्गा देवळाक उत्सवमुर्ती
कारापूरच्या श्रीशांतादुर्गा देवळाक भांगराची सत्री आनी उत्सवमुर्ती अर्पण केल्ली. केरीच्या श्रीआजोबा देवळाचेंय पुराय नुतनीकरण केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
