भांगरभूंय | प्रतिनिधी
दिवचल, प्रतिनिधी : सांखळेची नगराध्यक्ष रश्मी देसाय हांणी नगराध्यक्षपदाचो राजिनामो नगरपालिका संचालकांक सादर केलो. नियोजीत कबलाती प्रमाण आपूण हो राजिनामो सादर केल्ल्याचें देसाय हांणी स्पश्ट केलें.
सांखळे पालिकेंत १२ नगरसेवक आसात. तातूंत वट्ट स बायलो नगरसेवक आसात. नगराध्यक्ष पद बायलां खातीर रितें आशिल्ल्यान हेर बायलां नगराध्यक्ष जावपाची संद दिवपाची सुरवातीक कबलात जाल्ली. ताका लागून आता सिद्धी परोब हांची नगराध्यक्षपदार निवड जावपाची शक्यताय आसा.
सांखळे पालिका वेंचणूक जाले उपरांत फाटले चवदा म्हयने नगराध्यक्ष पद सांबाळटना मुख्यमंत्री डॉ. प्रमोद सावंत हांच्या मार्गदर्शना खाला स्वयंपूर्ण आनी आत्मनिर्भर पालिका करपा खातीर आमी जायत्यो येवजण्यो राबयल्यात. तांतल्यो कांय येवजण्यो चालीक लायल्यात. सुमार धा कोटी खर्चून उदरगतीच्यो येवजण्यो चालीक लायिल्ल्याचें नगराध्यक्ष देसाय हांणी सांगलें.
समाजीक सेवा येवजणे खाला पाचवें शार, नितळ शार हाचे वरवीं जायते प्रकल्प राबयल्यात. आमचे सांखळे पालिकेक नितळ शार खाला राष्ट्रीय पुरस्कार फावो जाल्ल्याचेंय तिणें सांगलें.
कांय प्रकल्प चालीक लागतले
नगराध्यक्षपद मेळ्ळे उपरांत सगळ्या नगरसेवकांच्या सहकार्यान नियोजन केलें. दरेका प्रकल्पा खातीर मुख्यमंत्र्यांनी सहकार्य करून निधी उपलब्ध करून दिलो. समाजीक उपक्रमा खाला धा नवीं कोयराचीं वाहनां, देशांतलें पयलें वेलनेस सेंटर, नियोजीत मार्केट प्रकल्प १५ कोटींचो आशिल्ल्यान ताची प्रक्रिया निमाण्या टप्प्याचेर आसा. स्वनिधी खाला देशांत सांखळे पालिका १४४ क्रमांकाचेर आसा. निधी मेळिल्ल्यान आमी जायत्यो येवजण्यो, प्रकल्प चालीक लायल्यात अशें रश्मी देसाय हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
