भांगरभूंय | प्रतिनिधी
भाजपा मंडळ समितीन मुख्यमंत्र्याची केली तोखणाय
दिवचल: सांखळी मतदारसंघांत भारतीय जनता पक्षाक 15,764 मतांची विक्रमी आघाडी मेळ्ळी. मुख्यमंत्री डॉ. प्रमोद सावंत हांच्या मार्गदर्शना खाला कार्यकर्त्यांनी हें येस मेळयलें. सांखळी भाजप मंडळा वतीन सगल्यांनी दिल्ल्या सहकार्या खातीर मंडळ समिती सगल्यांचे उपकार आनी अभिनंदन करीत आशिल्ल्याचें सांखळी भाजप मंडळ अध्यक्ष गोपाळ सुर्लीकार, संतोष मळीक, संजय नायक, स्वाती मायणीकार, पांडुरंग कुट्टीकार, सुनील सिनारी हांणी पत्रकार परिशदेंत सांगलें.
मुख्यमंत्री डॉ. प्रमोद सावंत हांणी उत्तर आनी दक्षीणेंत विसव घेनासतना 18 वरां नेमान काम केलें. उत्तर गोंयांत विक्रमी येस मेळ्ळें. सांखळी मतदारसंघांत सगल्या पन्नास प्रभागांनी विक्रमी आघाडी आमी घेतली. तातूंत डॉ. प्रमोद सावंत हांणी मतदारसंघांत केल्लें कार्य आनी लोकां कडेन आशिल्लें आपुलकीचें नातें कारण आसा. प्रधानमंत्री नरेंद्र मोदी, प्रदेश समिती अध्यक्ष सदानंद तानावडे, दत्ता खोलकार सगले पदाधिकारी, प्रभारी मंडळ, कार्यकर्ते, भाजप फुडारी, आमचे सगले कार्यकर्ते, महिला, तरणाटे, ज्येश्ठ अशा सगल्याच घटकांनी मोटें योगदान दिल्ल्याचें ह्या वेळार तांणी सांगलें.
महिला फुडारी स्वाती माईणकार हांणी सांखळी मतदारसंघांत भाजपान व्हड आघाडी घेतली. सगले घटक संघटीत आयलें. बायलांनी मोटें योगदान दिलें. कल्याणकारी येवजण्यो, केंद्र आनी राज्य सरकाराचें काम, मुख्यमंत्र्यांनी मतदारसंघांत दिल्लें विशेश योगदान हाका लागून सगली कडेन मोटे येस आयिल्ल्यान लोक समाधानी आशिल्ल्याचें सांगलें.
हाचे मुखारूय अशीच कामगिरी कायम दवरपा खातीर संघटणा नेटान काम करतली अशें ह्या वेळार भाजप पदाधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
