भांगरभूंय | प्रतिनिधी
वास्को, प्रतिनिधी: सांकवाळे पंचायतीच्या बसकेची विशयपत्रिका पुराय नाशिल्ल्यान तीन पंचांनी हरकत घेतली. ७ तारखेर जावपी बसका फुडें धुकलची, अशें मागणी करपी निवेदन मुख्यमंत्र्या सयत पंचायत संचालक, मुरगांवचे गटविकास कार्यालय, सांकवाळेचे सरपंच-सचीव हांकां दिलें. ह्या निवेदनाचेर तुळशीदास नायक, मौरिलिओ कार्व्हालो, निधी नायक ह्या पंचांच्यो सयो आसात.
हे बसकेचे नोटीशींत सविस्तर म्हायती दिवंक ना. बांदकाम परवान्या खातीर कांय जाणांनी ना हरकत दाखलो मागला. तशेंच हें बांदकाम खंयच्या प्रभागांत जातलें, ताचो सर्वे क्रमांक खंयचो आसा. तशेंच तें खंय आसा, अशे तरेची कसलीच म्हायती ते नोटीशींत नमूद करूंक ना. ही नोटीस दितना गोंय पंचायत कायदो १९९४ चें कलम ११३ (अ) प्रमाण, सगळी म्हायती विशय, पत्रिकेंत दिवपाची गरज आसा. तशेंच तें कलम पाळूंक नाशिल्ल्याचो दावो ह्या निवेदनांत केला. ही म्हायती दिवंक नाशिल्ल्यान गैरवेव्हार जावपाचो भंय उक्तायला. तशेंच नेम मोडिल्ले खाती संबंधितां आड शिस्तभंगाची कारवाय करची अशी मागणी केल्या. सात तारखेक आपयल्ली बसका फुडें धुकलची. बसकेची नवी तारीख जाहीर करची. ते बसकेचे विशय पत्रिकेंत पुराय म्हायती दिवची अशी मागणी निवेदनांत केल्या.
विशय पत्रिकेंत पुराय म्हायती दिवपाची गरज आसा. कांय जाणांनी बांदकाम परवाने मागयल्यात. हे विशीं पुरायेन म्हायती दिवपाची गरज आसा. तें बांदकाम खंयच्या प्रभागांत जातलें. हे विशीं म्हायती दिल्यार संबंदीत पंच थंय वचून थंयची वास्तुस्थिती समजून घेवपाक शकता. त्या बांदकामा वरवीं कितली रक्कम पंचायत तिजोरेंत जमा जातली. त्या बांदकामाचो सर्वे क्रमांक खंयचो ही सगळी म्हायती दिवपाची गरज आशिल्ली. मात फकत जांकां बांदकाम परवानो जाय ताचें नांवूच दिलां. हेर म्हायती दिवंक ना. आदीं पुराय म्हायती विशय पत्रिकेंत दिताले, अशें तुळशीदास नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
