भांगरभूंय | प्रतिनिधी
सायक्लोन शेल्टराच्या वेवस्थापनांत बेफिकीरपणा केल्ल्यान निर्णय
मडगांव, प्रतिनिधी : झुआरीनगर- मुरगांवच्या सायक्लोन शेल्टराच्या वेवस्थापनांत बेफिकीरपणां करप, वायट वागणूक आनी आपत्ती वेवस्थापन अध्यक्ष तशेंच जिल्लोधिकार्यांच्या आदेश पाळूंक नाशिल्ल्यान सांकवाळे पंचायतीचे सचीव ऑर्विल क्लिटंन वालेस हांकां सेवेंतल्या निलंबीत केला. हे विशींचो आदेश पंचायत संचालक सिद्धी हळर्णकार हांणी काडला.
ग्रामसेवक ऑर्विल क्लिटंन वालेस हांकां २७ ऑक्टोबर २०२२ त मुरगांव म्हालांतल्या सांकवाळे पंचायतीच्या सचिव पदाचो ताबो दिल्लो. तेन्ना मुरगांव झुआरीनगरच्या सांकवाळे सायक्लोन शेल्टराच्या वेवस्थापन आनी सांबाळ समितीच्या वांगडी सचिवांची जापसालदारकीय दिल्ली. नवी समिती स्थापन केले उपरांत सांकवाळेच्या चक्रीवादळ निवारा केंद्राचें काम योग्य तरेन नाशिल्ल्याचें जिल्लो आपत्ती वेवस्थापन अधिकारीणीच्या लक्षांत आयलें. कुठ्ठाळेचे आमदार आंतोन वाझ हांणी विधानसभेंत हे विशीं प्रस्न विचारिल्लो. ते प्रमाण दक्षीण गोंय जिल्लोधिकारी तशेंच जिल्लो आपत्ती वेवस्थापन अध्यक्ष अश्विन चंद्रू हांणी १७ आनी १८ जुलयाक कार्यालयांत हजर रावपाक सांगिल्लें. मात, न्यायालयाच्या आदेशा प्रमाण कांय कामां खातीर व्यस्त आशिल्ल्याचें कळयल्लें. पावसाक लागून मुरगांव म्हालांत पालसणां कोसळपाची घडणूक घडली. कांय लोकांक स्थलांतरीत करपाची गरज आसून लेगीत सायक्लोन शेल्टर केंद्र बंद आशिल्ल्यान तांकां बरेच त्रास सोंसचे पडले.
दक्षीण गोंय जिल्लोधिकार्यांनी १९ जुलयाक साडेचार वरांचेर निवारो केंद्रा विशींच्या बसकांची म्हायती, गरजेच्या कागदपत्रां सयत कार्यालयांत हजर रावपाक सांगिल्लें. मात ऑर्विल क्लिटंन वालेस हजर रावंक ना. सरकारी काम करतना बेफिकीरपणां करप, वरिश्ठांचे आदेश पाळप ना, वागणूक बरी ना अश्या विवीध कारणांक लागून सांकवाळे पंचायतीचे सचीव ऑर्विल वालेस हांकां बेगोबेग निलंबीत करपाचो आदेश पंचायत संचालकांनी जारी केलो.
निलंबनाच्या काळांत वालेस हांणी तिसवाडी हांगच्या गटविकास अधिकारी कार्यालयांत हजेरी लावपाचें आनी परवानगे बगर कार्यालय सोडप ना अशें आदेशांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
