भांगरभूंय | प्रतिनिधी
आदले पुलीस अधिक्षक सेमी तावारीस हांचो णवो तियात्र ‘ही आवोय कोसली?’ हालीं बरोच चलता. ताणें सांगिल्लें प्रमाण हो तियात्र सांग्यार घडिल्ले एके निश्ठूर घडणुकेचेर आदारीत आसा. पुलीस खात्यांत वावुरताना आपल्याक आयिल्लो अणभव ताणें ह्या तियात्राच्या माध्यमांतल्यान माचयेर मांडला. तियात्राचें कथानक ‘मानसीक थ्रिलर’ घेवन फुडें वता. एखाद्री घोव नाशिल्ली बायल (कॅंडीडा) आनी तिच्यो दोन धुवो ट्विंकल (ऑजलिया) आनी ताशा (जॉयनिशा) हांचो सुरवाती सावन कुटुंबीक संबंदांतलो असमानतायेचो संघर्श व्यक्त जाता. आवय उक्तेपणान आपली धाकली धूव ट्विंकल हिचो चड मोग करता, जाल्यार व्हडली धूव ताशा हिचे कडेन दुर्लक्ष करता आनी ताशाक घरांतल्या कामाचो सगलोभार सोंसचो पडटा. आवयचे हे वागणुकेचें काराण पुराय तियात्रांत स्पश्टपणान सांगूंक ना.
एक बलात्कारी आनी खुनी जेन्ना पुलिसां पसून वाचूंक तांच्या घरांत भितर सरता तेन्ना भंयान आनी गडबडीन आवय ताका पुलिसां पसून लिपोवपाक मजत करता. हांगां कथानक गंभीर जावन एक वेगळोच सस्पेन्स आनी धोको निर्माण जाता. ट्विंकल ताका ‘चॉकलेट मॅन’ म्हूण वळखता, जोतिच्या इश्कोला भायर चॉकलेटी दिता. एका भुरग्याचो अशा मनशा कडेन आशिल्लो हो निश्पाप संबंद कथानकाक अस्वस्थ विस्तार दिता.
एक दीस अचकीत ट्विंकल ना जावन ताचो खून जाता. ट्विंकलाक चॉकलेट मॅनान उखलून व्हेला आनी व्हरतना ताशान पळयला आनी ताका आडावपाचो यत्न केला म्हूण ताशा पुलिशेक कळीत करता. तर ट्विंकलाक व्हरपी आनी ताचो खून करपी तो चॉकलेट मॅन गुन्यांवकारी म्हूण आवय वांगडा प्रेक्षकूय मानून चलतात. पूण तियात्राच्या शेवटाक एक धपको दिवपी बदल घडून येता. ट्विंकलाचो खून करपी दुसरो कोण नासून ताची व्हडली भयण ताशा आसता. हो बदल प्रेक्षकांक सुरवातेक आयिल्ल्या सगल्या विचारांचेर परतून विचार करपाक लायता. हो तियात्र अपेक्षीत मोग, दुस्वास, भावनीक आघात आनी आवयचें असमान मोगाचे भिरांकूळ परिणाम दाखयता.
‘सस्पेन्स’ ह्या तियात्राचें खाशेलें आंग. लेखक सेमी तावारीस तियात्राच्या शेवटा मेरेन प्रेक्षकांक विचार करीत दवरपाक यशस्वी जाला. सोंप्या संवादांतल्यान हो तियात्र मुखार वता पूण म्हणी ओपारींचो संवादांत उणाव दिसून येता. जुनियर रेगन हांणी तियात्राच्या आशयाक धरून सुरवातेचें कांतार गायलां. तशेंच तियात्रांत कांताराचे हेर प्रकार; सोलो, दुवो, दुवेट, त्रिओ, चवको लेगीत पळोवपाक मेळटात. बॅण्ड नासताना कातरां ना देखून बॅण्ड तियात्राचो जीव मानतात. नॉर्मन कार्दोज आनी ताच्या पंगडान (रॉकी, जेस्लीन, एलोय, एलिओरा) बरें बॅण्ड वाजोवन, संगीत दिवन प्रेक्षकांची उर्बा वाडयल्या. कॉ. सेली, कॉ. सेमिका, कॉ. रिचर्ड, कॉ. मायरन, कॉ. डेवीड, कॉ. रेमंड हांणी बरो आनी मर्यादीत सायड शो करून प्रेक्षकांक हांसयलां. ह्या तियात्रांतली मुखेल पात्रां कमी आसलीं तरी तीं खुबूच प्रभावी थारतात. आवय आपल्या भुरग्यांचेर वेगळे वेगळे संस्कार घडोवन कथानकाच्या संघर्शाक चालना दिता. ‘फ्रॅंकी गोन्साल्वीस’ हाणें चॉकलेट मॅन आनी पुलीस अधिकारी अश्यो दोन भुमिका केल्यात. दोनूय पात्रां एकामेकां परस सामकीं वेगळीं आसून लेगीत ताणें दोनूय पात्रां बेभेस बरीं जिवीं दवरल्यांत.
आवयची वेशभुशा अणभवाक पट सारकी जावंक शकली ना. ती घरांत आसतना आनी तिच्या धुवेच्या मरणा उपरांत लेगीत फॅशनेबल कपडे आनी हाय हिल्स घालून दाखयल्या. हें त्या भावनीक परिस्थिती कडेन मेळ जायनाशिल्लें. सादी-सोबीत, परिस्थिती कडेन नातें दाखोवपी भेसवण आशिल्ली जाल्यार तें पात्र आनीक उठून येवपाचें. तशेंच पळोवप्यांक काणये कडेन चड लागीं हाडपाक पावतलें आसलें.
हो तियात्र मानसीक संघर्श आनी सस्पेन्स हांचो एक बरो मेळ आसा. तियात्राचो शेवट मनाचेर खोल परिणाम करता आनी प्रेक्षकांक आवय-बापायचो मोग, मानसीक भलायकी आनी न्याय हांच्या म्हत्वाचेर विचार करपाक लायता.
रॉशेल गुदिन्हो
7249064582
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
