भांगरभूंय | प्रतिनिधी
इमेजिन पणजी
–
पंधरा वर्सां पयलीं खासगी कंपन्यांनी ह्या जार्दिन्यांक नवें रुप दितना काँक्रिटीकरण हाडिल्लें, नवनिर्मणेत वतना काँक्रिटाचें जाळ नाका, बांकडेय नव्या रुपांतले आसचे, जार्दिनाच्या लागींच्या वाठारांत रावतल्यांक विश्वासांत घेवपाक पावलां मारचीं.
आदलेवरीं सवण्या पिलां नाचपी, झोपाळे, घसरगुंड्यो नवनिर्मणेतल्या जार्दिनांनी मेळटल्यो, अशी आस्त पणजेकारांक आसा. नवनिर्मणे कडेन वतना राजधानी पणजेतलें रस्ते तांबडे जाल्यात, उदकाच्यो झरीय व्हांवतात, फोंडकुलांय पडल्यांत, पूण येरादारीची कोयंडी सोंपना. बांदोडकर जिमखान्यांच्या लागसाल्लो पणजेतलो दुसरो नरीमन पाॅयंट सकाळ, सांज पणजेकारांक, भोंवडेकारांक आपयता, पूण अजूनय कडक सुरक्षा यंत्रणा ना. येणावळ दिवपी पणजेंतल्या दुसऱ्या कांपाल पाॅयंटार भोंवडेकारांक हाडून सोडपी बसी जिमखान्याच्या भायले वटेनच्या जाग्यार पार्क करतात. तांचे कडल्यान पार्किंगाचे पयशे घेतल्यार महापालिका स्वयंपूर्ण कित्याक जावची न्हय?
साधनसुविधा म्हामंडळ, भौशीक बांदकाम खाताच्या चपक्यांतल्यान भायर सरपी येवजण करपाक जाय ती कुशळटाय म्हापालिकेंत आसा? पणजेच्या आमदारांनी पणजेकारांक स्मार्ट सिटी पंधरा- सोळा वर्सां आदीं इमेजिन केल्ली तशीच आसतली, तातूंत बदल जाला हें सांगपाक जायच. दिवाळी लागीं येतना एका वाॅर्डांत एकच नरकासूर आसतलो, भौशीक जमाती उण्यो करून ‘वाॅक द टाॅक’ जातलें हाची जतनाय पणजेच्या आमदारांनी घेवची.
साबार राज्यांच्या राजधानीच्या लागसार जुवळ्या शारांचे बांदावळीची स्मार्ट सिटीची मुळावी येवजण आसली. अर्थकारणाक बळगें दिवप हीच स्मार्ट सिटीची मोख आसली, वर्सा भितर गोंयांतली पयली म्हापालिका पणजी ते दिकेन पावतली. नवनिर्मणे कडेन वतना ज्यो नव्यो अर्थकारणाच्यो सुवाती जातात थंय थळाव्यांक बेगीन आसपावन घेतल्यार म्हापालिका बळिश्ट जातली. नव्या कांपाल पाॅयंटार नितळसाण येवपाक लागल्या, बेगींतल्या बेगीन त्या पाॅयंटाक आदल्यो मुखेलमंत्री शशिकला काकोडकार हांचे नांव दिवचें, दिवाळेच्या आदल्या दिसा धनत्रयोदिसा ती कार्यावळ जायत व्हय? वाराणशीवरी त्या पाॅयंटार पणत्यो पेटत?
कांपाल पाॅयंटार सुचोवण्यो दिवपी बोर्ड बेगीन कोण लायतलो? जेवणा-खाणाची सुविधा केन्ना मेळटली? नवनिर्मणे कडेन वतना भेळपुरी, पाणीपुरीचे गाडे बालभवना कडल्यान कला अकादमीच्या मुखार आशिल्ल्या मोडणा वेल्या कांपाल काॅलनीतल्या रस्त्यार पावल्यात. त्या गाडेवाल्यांची बसका घेवन तांचे कडेन भासाभास केल्यार अर्थकारणाच्यो नव्यो वाटो पणजेच्या आमदारांक दिसतल्यो. शारांत भितर सरतना आशिल्लें पयल्या नरीमन पाॅयंटा वेलें आंबेडकर गार्डन, फाजेंता कडलें जलपरी गार्डन, व्हेल्यो बिल्डिंगे लागसाल्लें मुखेल म्हापालिका गार्डन, इगर्जे कडलें धाकटुलें गार्डनच न्हय जाल्यार आदले खासदार शांताराम नायक हांच्या खासदार निधींतल्यान केल्लें गुलाबांचें जार्दिन्य, उत्तर जिल्होधिकारी कार्यालया कडलें घसरगुंडी, झोपाळ्याचें तशेंच हेर जार्दिनां फुलां, फळां सवण्या पिलां खातीरच आसचीं. पंधरा वर्सां पयलीं खासगी कंपन्यांनी ह्या जार्दिन्यांक नवें रुप दितना काँक्रिटीकरण हाडिल्लें, नवनिर्मणेत वतना काँक्रिटाचें जाळ नाका, बांकडेय नव्या रुपांतले आसचे, जार्दिनाच्या लागींच्या वाठारांत रावतल्यांक विश्वासांत घेवपाक पावलां मारचीं.
नवीं जार्दिनांय फाटल्यां पंधरा वर्सांत जालीं, म्हापालिकेचे नगरसेवक थंय केन्ना पावल्यात? म्हापालिकेचे जार्दिन तशेंच हेर समित्यांनी चलत, भोंवत वचून जासूसी केल्यार पणजेकार अस्तंत बंगाल, ओरिसा, गुजरात, बिहारा वरी नवरात्रां मनोवपाक लागल्यात, अशें झगझगपी वस्त्रां, देवीच्यो मूर्ती, व्हडल्यो पणत्यो ही सामग्री सांगतली.
नवनिर्मणेंत वतना पणजेत पणजे भायले येतलेच, तांकां आडावपाक जायना, येतना ताणीं शांतीकाय हाडची, तंटे, झगडीं, ड्रग्ज पयस दवरूनच पणजेकारां वांगडा एकवटान रावचे. नवरात्रांत देवी महालक्ष्मीय पालखेंत बसून पणजेच्या कोनशा-कोनशाक भोंवचीना, पणजेकारांक आपल्या पायां कडेन हाडटली, उपाट गर्दीय जातली. एक तरी शाळा सरस्वतीपूजन करतली, कोजागरीक नव्या कांपाल पाॅयंटार विद्यार्थ्यांक हाडल्यार नाच, पदां, कवितांची मंद मंद पायजणां आयकूंक येतलीं.
– सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
