भांगरभूंय | प्रतिनिधी
पणजी: कांदोळेच्या एका जाग्यार दर्यादेग नियंत्रण वाठार (सीआरझेड) नेमांचो भंग जाल्ल्याचो आरोप करपी एका भौशीक हिताचे याचिकेची (पीआयएल) दखल घेवन मुंबय उच्च न्यायालयाच्या गोंय खंडपीठान बॉलिवूड नट सलमान खान हाका नोटीस धाडल्या.
कळंगूट कॉन्स्टिट्युअन्सी फोरमान दाखल केल्ले हे याचिकेंत, कांदोळेच्या एका प्लॉटाचेर जाल्ले बांदावळीक आव्हान दिलां. ही बांदावळ सीआरझेड-III नेमां आड १०० – मिटर नो डेव्हेलोपमेंट विभागांत केल्या असो आरोप आसा.
याचिकादारांच्या म्हणण्या प्रमाण, सिकेरी न्हंयेच्या भरतेच्या पांवड्या सावन सुमार ५५ मीटर अंतराचेर निवासी विला आनी स्विमिंग पूल बांदल्यात, जाका लागून पर्यावरण आनी सीआरझेड कायद्यांचो भंग जाला अशें म्हणलां. ही बांदावळ ’क्लासीक सिटी इन्व्हेस्टमेंट्स प्रायव्हेट लिमिटेड’ हे कंपनीन केल्या अशें हे याचिकेंत म्हणलां आनी सलमान खान हो हे कंपनीचो वेवस्थापकीय भागीदार आसा, असो दावो केला.
मंजूर जाल्ले बांदावळीचे येवजणे परस चड बांदावळ केल्या असोय आरोप याचिकेंत केला. ३० एप्रिल २०२५ दिसा कांदोळे ग्रामपंचायतीन दिल्ल्या ‘आॅक्युपेन्सी प्रमाणपत्रा’चे वैधतेचेर प्रस्न उप्रासल्यात. हें प्रमाणपत्र दितना प्रक्रियेंत घोळ जाला असो दावो केला.
हे भौशीक हिताचे याचिकेंत गोंय सरकार, गोंय किनारी वाठार वेवस्थापन प्राधिकरण (GCZMA), कांदोळे ग्रामपंचायत आनी पर्यावरण, रान आनी हवामान बदल मंत्रालय हांच्या वांगडा हेर कांय प्राधिकरणांक प्रतिवादी केल्यांत.
उच्च न्यायालयान सगळ्या प्रतिवादींक नोटिशी धाडल्यात अशें कळटा, आनी ह्या आरोपांचेर आपले जाब दाखल करपाचे निर्देश दिल्यात. हे जाब दाखल केल्या उपरांत ह्या प्रकरणाची फुडली सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
