भांगरभूंय | प्रतिनिधी
जिल्हो आनी सत्र न्यायालय संकुलाचे उक्तावण
पणजी : सर्वोच्च न्यायालयाचे निवाडे भारतातल्या सगळ्या भाशेंतल्यान अणकारीत जावपाक लागल्या. आता कोंकणी आनी मराठीतल्यान लेगीत निवाडे उपलब्ध जातलें. उच्च न्यायालयाचे निवाडे लेगीत थळाव्या भाशेंतल्यान उपलब्ध जावपाक जाय. आब्रिट्रेशन केंद्रा सारख्यो गजाली जाल्यार संवसारिक पावंड्यावेले अर्थिक केंद्र जावपाची तांक गोंया मदीं आसा, अशें सर्वोच्च न्यायालयाचे मुखेल न्यायाधीश डॉ. धनंजय चंद्रचूड हांणी सांगलें.
मेरशे जिल्हो आनी सत्र न्यायालय संकुलाचे आयज उक्तावण जाले. सर्वोच्च न्यायालयाचे मुखेल न्यायाधीश डॉ. धनंजय चंद्रचूड, मुख्यमंत्री डॉ. प्रमोद सावंत, कायदो मंत्री आलेक्स सिक्वेरा, हेर न्यायाधीश आनी मानेस्त ह्या कार्यावळीक हाजीर आशिल्ले.
गोंयची उदरगत आनी न्यायपालिके खातीर तयार जाल्ल्यो सुविधा पळोवन हांव प्रभावित जाला. सामान्य मनीस सगळ्यांत पयली न्याया खातीर जिल्हो आनी सत्र न्यायालयांत वता. याचिकादारांक योग्य तरेची वागणूक आनी सुविधा मेळपाक जाय. बायलां आदोवगाद आनी बायलां कर्मचाऱ्यांक भलायकी तशेंच नितळसाणी खातीर सुविधा निर्माण करपाची गरज आसा. न्यायालयात बायलांचो आदर करपी भाशेचो वापर जावपाक जाय. अर्वाच्च भाशा बंद जावपाक जाय, अशीं आस्त मुखेल न्यायाधीश धनंजय चंद्रचूड हांणी उक्तायली.
न्याय बेगीन दिवपाक नवे संकुल पूरक थारतलें : मुख्यमंत्री डॉ. सावंत
लोकशाये खातीर न्याय आनी समानता आसप आवश्यक आसा. गोंय सरकार सेगीत न्यायपालिकेक तेंको दित आसा. नवें संकुल प्रलंबीत खटले बेगीन निकालात काडपा सयत लोकांक बेगीन न्याय दिवपाच्या प्रकियेत उपेगी थारतले, अशें मुख्यमंत्री डॉ. प्रमोद सावंत हांणी सांगलें. सत्र न्यायालय हे सर्वोच्च न्यायालयाचोच फांटो आसा, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
